港聞

下一篇
上一篇

【Emily Online】倪匡自創打油詩樂做閒雲野鶴 點睇特首選舉?佢答咗3個字...... (00:02)

已經81歲、封筆多年嘅本港著名作家倪匡,而家生活追求悠閒,仲自創打油詩「起身坐低吔吔叫,行多兩步攤攤腰,食飽瞓瞓瞓飽食,疊埋心水等寵召」作為生活原則。

其他報道:稱選舉應君子之爭無需旁人指點 杜琪峯撐曾俊華有親和力:好領導人不撩事鬥非

雖然好耐無出書,但讀者人數有增無減,而家都仲有好多人對倪匡嘅作品有興趣,好想同佢合作,怕煩嘅倪匡今個月開始,索性將日後作品版權問題交畀契女,即係豐林文化傳播負責人施陳麗珠處理。倪匡話咁多年嚟,佢啲作品版權都畀過唔同人,都記得唔太清楚,話總之以後有嘢就搵施太傾啦。

雖然話熱愛閒雲野鶴生活,但倪匡對國際及時事都仍然好關注,講到近日因為美韓部署薩德反導彈系統,搞到內地一片反韓潮,倪匡笑言諗唔通:「點解係針對韓國,唔係嬲美國?我真係諗唔明。」佢話呢啲本末倒置嘅事近日特別多,好似早前七警案判刑坊間大鬧洋法官,佢就話理論上法官都係按法律判案,反問點解唔係鬧決定檢控嘅政府同律政司。

講到香港近日最熱話就一定係特首選舉,問到倪匡有咩睇法,佢笑笑答咗三個字,就係「無懸念」,仲話「呢啲嘢共產黨一早定晒㗎啦」。咁即係睇好邊個呢?Emily聽到佢個答案就真係充滿懸念嘞。

其他報道:向華強子向佑涉打的士司機 上訴被駁回 即時還押囚半年

其他報道:演藝界三筆撐警捐款遭退回 兩協會讚涉事公司業界翹楚嘆抹黑 700萬捐款由協會暫管

相關字詞﹕編輯推介 倪匡 特首選舉 曾俊華 林鄭月娥 胡國興

上 / 下一篇新聞