港聞

【短片:Emily Online】勸服危站同鄉返地面 巴裔警員受訪:執勤市民見識講中文「O咗嘴」 (23:05)

一名南亞裔男子噚日被發現喺油麻地西區海底隧道九龍入口外,攀上一架停泊喺路邊嘅吊臂車臂架上危站,其間一名南亞裔警員接報到場,喺「同聲同氣」之下,勸服咗事主安全返落地面送院檢查。呢名警員就係20歲嘅范業成,雖然佢中文名姓范,但其實佢係一名巴基斯坦裔警員,英文全名係Ifzal Zaffar,已經駐守咗油麻地警區近一年喇!

警察facebook專頁今日就上載咗范業成嘅訪問,佢話油麻地區內比較多南亞裔人士,協助佢哋嘅時候,自己就好發揮到語言能力,佢笑笑口話,相信因為大家「同聲同氣」,容易啲同事主建立互信同處理案件。

范業成仲話,「投考警察係我由細到大嘅夢想」,佢本身係少年警訊嘅會員,讀書時期經朋友介紹,參加咗油尖警區嘅「寶石計劃」,當中有義工為南亞裔人士舉辦中文班,亦有警察義工分享投考警察同面試技巧。佢又憶述,當初同屋企人講想考警察時,佢哋都有啲懷疑,因為當時好少成功例子,佢就同家人講,「你畀個機會我啦」,之後家人都願意支持佢,最終佢仲不負眾望,成功投考警察,成為軍裝警員。

問到范業成平日嘅執勤情況,佢就話平日遇到嘅香港市民都好友善,好多時見佢識講中文,「都O咗嘴」,佢就會同對方溝通吓,又報以微笑回應,感覺大家互動都好親切。

其他報道:涉鎚擊丈夫頭部 妻子否認傷人罪:我非常愛我老公

其他報道:陳志雲爆直播拳賽無綫要主辦方付錢 嘆觀眾無緣直擊曹星如19連勝 無綫:無中生有  

其他報道:【短片:梁振英任政協副主席】梁:與特首職務重疊短 信可兼顧家庭 

相關字詞﹕編輯推介 警察 南亞 范業成

上 / 下一篇新聞