港聞

【Emily Online:特首跑馬仔】決定回流被外母「鬧咗好多年」 曾俊華稱好怕老婆:番屋企佢叫做咩就做咩 (12:43)

特首候選人曾俊華(John)同太太(Lynn)不時曬恩愛,但原來John係一個怕老婆嘅人,仲話「番到屋企佢叫我做咩就做咩」。

其他報道:明報特首選舉專頁

曾俊華接受「頭號薯粉」自由黨榮譽主席田北俊嘅商台節目訪問時,講到當年要出席一個晚宴搵partner,透過曾爸爸一啲香港學生介紹咗Lynn畀佢認識,仲強調「梗係我追佢啦」。

田北俊又投訴話曾俊華送畀太太嗰本相簿「累死好多香港男人」,John就話當時讀建築比較art,影相又ok,仲話有段時間同禮品公司Hallmark畫過一啲賀卡,「所以我畫嘢ok架」。

被問到怕唔怕老婆,曾俊華諗都唔諗即答「梗係怕啦,好驚架!(有幾驚?)驚到番屋企,老婆叫我做咩就做咩」,又話喺屋企唔睇新聞,睇啲比較溫馨嘅電影,避免畀老婆睇到自己喺公開場合講過嘅嘢」。

曾俊華又提到,佢80年代返香港時,有兩個選擇,一係做一間國際學校嘅校長,二係做AO(政務主任),最後佢就揀咗AO。被問到喺美國好哋哋做咩要番嚟,佢話「外母都鬧咗好多年,有兩個仔女,住同食都好穩定,做咩要改變」,但當時睇到附近一啲好中產嘅鄰居,好擔心自己幾十年後,都好似佢哋咁過一個好單調嘅生活,又見到亞洲經濟起飛,希望同細路仔番嚟出生嘅地方生活,服務社會。

佢又話回歸係一個大改變,咁樣吸引到佢,覺得自己嘅學歷、經驗可以為香港帶來改變。

其他報道:林煥光:一般人不會投一個必輸的人 不排除有人打心理戰

其他報道:梁振英當選全國政協副主席 2066票贊成 13票反對 16票棄權

相關字詞﹕特首選舉 曾俊華 田北俊 薯粉 曾俊華怕老婆 特首選戰

上 / 下一篇新聞