港聞

【短片:Emily Online】曾俊華原來識絲帶舞 中國舞團結緣 陳慧珊讚「鬍鬚哥哥」剛柔並重 (13:39)

行政長官參選人曾俊華(John)中午喺facebook上載電視藝人陳慧珊(Flora)「打氣片」,兩人相識於微時,原來係因為一齊喺美國波士頓學中國舞!Flora仲讚John剛柔並重,學習能力高,仲係舞團男主角、暫代隊長。

其他報道:明報特首選舉專頁

Flora喺片段中話,John由細睇到佢大,「我當佢係大哥哥」,大家對中國舞蹈嘅熱誠連結到兩人嘅緣份,而Flora爸爸就係曾俊華嘅舞蹈老師。

Flora話John係舞團男主角,個子好高,有鬍鬚,學習能力好高,只係睇過數次嘅舞步就能夠學識,除咗跳弓舞、蒙古舞比較剛硬嘅舞蹈,仲會跳絲帶舞,反映出佢個性剛柔並重,「唔會企硬、一定要用剛硬嘅手法」。

佢又讚「鬍鬚哥哥」有創意同變通,亦係好好嘅聆聽者,而佢最近攻讀緊教育博士學位,John都好支持佢,因為佢相信「教育係向前邁進嘅道路」。

Flora又話John喺舞蹈團會暫代隊長職務,面對突發情況好快作出決定,又有幽默感,會令身邊人好想親近他,因佢平易近人,而「佢態度唔係為自己,而係為整個舞蹈團」,形容佢嘅性格「非常難得」。

陳慧珊仲講到,佢同「鬍鬚哥哥」好似,即使大家喺美國學習西方教育,但個心一路都好「中國人」,好喜歡中國文化。

佢喺短片最後話,「由細到大,你喺我心目中係一個好好嘅鬍鬚哥哥」,期望曾俊華可以當選特首。

其他報道:【依法埋站】的士停怡和巴士站即被抄牌 記者直擊個半小時至少10架

其他報道:陳健民指會面後感悲涼 葉劉淑儀稱感觸:(有泛民人士)見到我今天的遭遇,感到十分心寒

相關字詞﹕特首選舉 編輯推介 曾俊華 特首跑馬仔

上 / 下一篇新聞