港聞

下一篇
上一篇

【短片:Emily Online】曾俊華再致電市民傾教育問題 稱自己係教育「半個老本行」 (19:30)

行政長官參選人曾俊華今日再推出「曾‧connect」影片,繼續分享佢打電話畀市民討論社會議題嘅過程。

今次「曾‧connect」第二集長7分44秒,比上一集長3分鐘,都係討論教育議題為主,對象由家長轉為中學教師Carmen。曾俊華表明身分後首先同電話另一邊嘅Carmen講,「多謝你為我祈禱」,Carmen回答「唔好客氣」後話「我真係唔知你真係會打返嚟」。

曾俊華話係收到Carmen留言,所以打電話回覆,不過就無喺facebook帖子入面引述對方嘅留言,佢感謝對方支持自己政綱,話政改係市民期望,自己希望能夠重啟政改,盼望可以成功。

Carmen坦言現時「好多都係合約教師」,教學環境「好多唔穩定」,並反映教育局每年有好多唔同名義嘅撥款,但增聘返嚟嘅教師往往做一兩年,撥款完結後就要離職,教師出到去又好難搵工,睇唔到當局喺呢方面有長遠計劃,直呼合約教師「好陰公」。

Carmen舉例,自己喺學校做生涯規劃,但同自己受過相關訓練嘅教師,無幾耐就要走,認為教育局放資源培訓老師後,未必可以喺之後發揮出嚟,覺得好浪費。

佢又繼續吐苦水,話特首梁振英早前撥款畀學校搞生涯規劃,其間學校推薦教師出去受訓,但教育局上學年改口風,鼓勵校長將嗰筆撥款轉為請常額教師,變相無咗搞生涯規劃嘅資源,令原來由非政府組織等提供嘅相關服務要煞停。

曾俊華話絕對同意Carmen嘅意見,話早前同教協傾過呢方面,如果自己贏到選舉,「可以增加投入去教育界」,創造穩定環境畀老師,改善教學質素。

曾俊華喺facebook補充,話自己係教育「半個老本行」,多年前喺美國做過教師、編寫課程,又係教育碩士,擔任財政司長9年幾,教育經常開支每年增加超過20億,並形容「要教育局提出可行的項目,我都撥出足夠資源推行,從不缺錢」。

曾俊華補充,自從「曾・Connect」推出後,收到「海量的市民意見及電話號碼」,希望大家原諒佢未能一一回覆,又話自己同團隊會繼續認真細看,希望聆聽來自唔同行業、唔同背景市民嘅意見。

其他報道:迪士尼新酒店4月尾開幕 共提供750房間一晚2200元起 上世紀探險黃金時期為主題

其他報道:曾蔭權陪審團要求以日常例子說明第三控罪 官指需時考慮押後再開庭

其他報道:葉劉稱獲兩道教選委提名票 道教聯指傾向綑綁提名

相關字詞﹕特首選舉 曾俊華 編輯推介

上 / 下一篇新聞