港聞

【Emily Online:特首跑馬仔】學生問菠蘿包幾錢 曾俊華:睇你邊度買 最平4蚊個 (23:16)

特首參選人曾俊華「吸金」能力驚人,推出眾籌數日,直至今晚已經累積到440多萬競選經費,超過2萬幾位市民參加。不過,佢噚日推出嘅政綱,有關23條立法同重啟政改部分,惹部分市民不滿。薯片叔叔下晝去樹仁大學嘅交流會,遇到學生提出尖銳問題,質疑佢只係靠形象贏支持,又問如果有市民要求佢「回水」得唔得。薯片叔叔就話,回水好難,因為唔知係咩人捐咗錢,「想回水,真係對唔住喇」。

其他報道:林鄭認民意落後 歸因較接近梁振英

佢之後又畀學生挑機,質問佢知唔知依家粟米斑塊飯同菠蘿包價錢。2011年唔知粟米斑塊飯價錢嘅佢,今次就難唔倒佢,薯片叔叔話要睇你去邊度買,話菠蘿包最平4蚊有一個,貴嘅都要8蚊,力證自己唔離地。

佢又講番自己參選後,曾去過冬菇亭食豆腐火腩飯,認為屋邨價都要50幾蚊碟,一啲都唔平。

其他報道:明報特首選舉專頁

其他報道:晤地產建設商會 葉劉:地產界服務市民,背負「官商勾結」污名無助解土地問題

其他報道:【短片:特首跑馬仔】張德江稱中央只撐林鄭 胡國興:香港不需「不接地氣、產生更多矛盾」的新特首  

相關字詞﹕ 編輯推介 特首選舉 曾俊華

上 / 下一篇新聞