港聞

下一篇
上一篇

【Emily Online】張超雄退休告別理大 新正頭送書超搶手 (21:28)

工黨立法會議員張超雄(阿Fer)今個月尾就滿60歲,身為應用社會科學系講師嘅佢,喺理大教咗20年書,即將榮休,好多學生都唔捨得佢。阿Fer教咗咁多年書,積埋唔少參考書、教材等等,新春假期結束之後嘅今日,阿Fer下晝就喺facebook發帖,話「退休前大清貨,免費書任取」,歡迎所有人去到佢理大office拎。

從阿Fer上載嘅圖片見到,啲書多到堆滿咗佢門口,而且不同種類、中文英文都有,唔單止有社會科學嘅參考書,連唐詩三百首、各類小說同健康書籍都有,而阿Fer一聲號召,好多學生即刻一呼百應,去到佢office門口「執書」,唔使一個下午,啲書已經清得七七八八喇!

有唔少學生都喺個帖下面留言,話好唔捨得阿sir,估唔到佢咁快退休,阿Fer都有親自回應,話自己60歲喇,亦有唔少人都慨嘆理大又少一個好老師。不過亦都有人話,「年初五流流叫人『執書』,真係百無禁忌!」阿Fer就用一個哈哈笑回應,一笑置之!

其他報道:曾俊華見鄉議局提混合發展丁屋及居屋 劉業強:曾先生走中庸之道 我哋都覺得唔錯

其他報道:點心皇前老闆疑不滿飛機延誤虛報炸彈 辯方質疑空姐聽錯「熱到爆炸」變「行李爆炸」

其他報道:交友程式認識 29歲女碩士生應邀赴網友寓所被姦

相關字詞﹕編輯推介 emilyonline 張超雄

上 / 下一篇新聞