港聞

下一篇
上一篇

【Emily Online】證實江湖傳聞 張建宗做9年局長未放過假! (13:42)

新任政務司長張建宗今日喺志雲大師(陳志雲)嘅商台節目,證實咗一個江湖傳聞,就係佢真係唔放假架!不特止唔放假,問到佢平日幾點放工,司長簡單利落咁話:我唔睇鐘架……

其他報道:曾俊華寫「莫忘初心」鼓勵自己 主持播歌《紅綠燈》問感受 曾:睇唔到燈喎

張建宗話,佢一定爭取勞工權益,亦明白假期同作息重要,「但我從來唔放假」,因為他熱愛工作,如果放假都係不斷睇住新聞、關心社會,不如索性番工。

佢話當年選擇55歲提早退休,當佢離開公務員行列時,一共放棄咗280日假期,如果換成錢都夠買一間丁屋!唔單係咁,「我做咗局長咁耐,9年幾,未放過一日假,亦都我每年22日(年假)架,送番晒畀政府,嗰啲係唔可以攞錢」,因為局長係唔可以「以錢代假」嘅。張建宗又話,佢日前轉任司長,同事同佢講,佢做局長嘅假期取消晒喎,佢嘅反應係:「話畀我聽做乜呢,我都唔放嘅。」

志雲大師話張建宗咁都未搞到離婚真係奇蹟,佢就答話,自己係從一而終嘅人,一個僱主、一個服務對象、一個太太。佢又被問到平日幾點收工,佢好自然咁話:「我唔睇鐘架。」仲話自己收工番到屋企,食完飯就會消失咗去繼續做嘢,而太太亦諒解佢。

不過,司長強調公私分明,自己還自己,為人群服務而不斤斤計較,但應該爭取嘅勞工權益仍然會努力爭取。

問到佢唔通乜嗜好都冇?張建宗話最鍾意睇新聞,引來旁人大笑。佢仲回憶話當年睇到一宗嚴重工業意外嘅突發新聞,佢就攞住鋼盔、平安鞋衝到現場,當時同事一個都未到,話仲未收到報告。志雲大師話,咁佢可以同前政務司長林鄭月娥好夾,張建宗就話:「有啲唔同,佢係女人我係男人。」再次引來哄堂大笑。

張建宗唔認為自己生活乏味,自言係一好簡單平凡嘅人,同家人關係好好,有一個外孫、一個內孫,重視家庭樂,有時間就同家人行山同飲茶。

其他報道:梁振英笑言不是普京無計劃再選 期待搬離禮賓府

其他報道:張建宗:下屆政府或要檢討稅制

其他報道:接棒「好打得」司長 張建宗笑言自己「做得」 願繼續服務不介意崗位

相關字詞﹕編輯推介 張建宗

上 / 下一篇新聞