港聞

【Emily Online:特首跑馬仔】訪港大宿舍與學生談社會流動 曾俊華:被一幢樓綁死青春不值得 (21:07)

考慮參選特首嘅前財爺曾俊華呢排頻頻落區,噚晚就去咗港大宿舍馬禮遜堂出席活動,同年輕人傾咗關於社會流動嘅議題。曾俊華今日喺佢facebook分享返噚日嘅情況,佢「入Hall隨俗」,獲贈一件俗稱「M Coat」嘅宿舍外套,除咗本地生外,又同咗內地生同外國研究生傾偈,仲同學生去咗宵夜飯堂可可店添,佢話多謝同學邀請佢一齊「食宵」,感受青春美好。

其他報道:明報特首選舉專頁

宿舍唔少同學向曾俊華表達對前路徬徨同埋置業等等問題。曾俊華話,以前八九十年代向上流動機會的確多,嗰個年代大學生無疑係吃香嘅一群,但今時今日大學生面對嘅唔係「港大」同「中大」之間嘅競爭,而係同其他地方精英之間嘅競爭,不過佢認為依家年輕人喺國際間機會比以前更多,喺社會較穩定情況下長大,創意較強,亦係向上流動嘅一種實力。

曾俊華又話,要解決樓價高企要整體從房屋供應落手,不過佢認為,置業係人生大事,大家都希望有個安樂窩,但如果被一幢樓綁死青春,實在唔值得,鼓勵同學喺20多歲呢段時間,有更多珍貴事情值得佢哋去經歷,希望佢哋珍惜大學同初出社會呢段人生中最美好嘅時光。

其他報道:陳志雲讚除眼鏡樣「柔情好多」 林鄭:唔好玩啦,阿姐你都玩

其他報道:葉劉感委屈哽咽 林鄭:Regina,你很有擔當

其他報道:趁曾俊華辭職開大水喉? 梁振英:負擔得起,每年有盈餘

其他報道:毛孟靜批施政報告英文主題「咩英文嚟㗎?」 「發展經濟」做口號「都癲嘅!」

相關字詞﹕編輯推介 特首選舉 曾俊華

上 / 下一篇新聞