港聞

下一篇
上一篇

【短片:Emily Online】胡官搭貨𨋢講擔當:有擔當都要識拉閘! (10:53)

特首梁振英昨日公開讚特首參選人林鄭月娥「有擔當」,令另一參選人、新民黨主席葉劉淑儀哽咽地在記者面前反問「唔通可以話我對香港社會無擔當咩?」。「有擔當」一時間變咗特首選戰熱門關鍵詞;已表明參選嘅退休法官胡國興亦不落後人,將自己噚晚搭𨋢嘅事拉埋擔當嚟講,話「有擔當都要識拉閘!」

胡官今朝9點幾喺facebook專頁發文,話自己噚晚出席IT vision聚會見選委時,由於路上嚴重塞車而遲到,去到時大廈客𨋢又咁啱上升中,為免大家久等,佢就選擇搭貨𨋢上樓。

其他報道:明報特首選舉專頁

然後,胡官好巧妙咁從搭𨋢事件聯想到「有擔當」,但佢就無哽咽,而係幽默咁話:「拉閘唔容易,要成功入閘,當然要親力親為」,強調「有擔當都要識拉閘!」仲加咗唔少hastag,例如「成功入閘」、「白金升降機」、「大塞車無得去洗手間」、「遲到咗唔好意思」等。

口講無憑,有片有證據。胡官同時上載咗一段約9秒嘅片段,片中見到佢入貨𨋢後真係親自拉閘,然後話「我…去…去去洗手間先」。

貼文上載咗唔夠一個鐘,成功得到300幾個「讚好」同百幾個「哈哈」,睇嚟網民幾受落咁喎。仲有人留言提醒「崎嶇嘅路真係唔容易行架」,又有人話「看來胡官好有決心開番8‧31人大落左(咗)果(嗰)個閘!」至於係真唔係,Emily就睇唔透喇。

對於梁振英嘅「有擔當」論,葉太同胡官都相繼回應咗,連林鄭月娥亦喺今朝電台節目有講到,唔知未正式宣布參選嘅「薯片叔叔」曾俊華有咩睇法呢?Emily真係好好奇喎!

其他報道:與曾俊華獲批辭職快慢不同 林鄭不認為有欽點 強調靠自己努力

其他報道:林鄭競選辦運作 張國鈞加入 曾俊華最快明交代參選

其他報道:梁振英2.0? 林鄭稱延續施政理念非路線 自言政府經驗比梁多

相關字詞﹕特首跑馬仔 特首選舉 胡國興 林鄭月娥 葉劉淑儀 曾俊華 編輯推介

上 / 下一篇新聞