港聞

【圖輯:Emily Online】回顧2016政治關鍵詞:書店、魚蛋、行李、摸底、DQ…… (16:53)

講起書店同魚蛋,你諗起咩?2016年發生嘅重要政治事件,為呢兩個詞語賦予咗另一重意思,你知道點解嗎?

話說2016年一開始,銅鑼灣書店5人失蹤事件曝光,懷疑同出版有關內地嘅政治敏感書籍有關。其中負責人李波自稱用「自己方式」返咗內地協助查案,因無出入境紀錄,惹來內地跨境執法嘅質疑,但亦有人話李波係自己偷渡返去,甚至係坐「洗頭艇」。李波終於喺3月返港,承認自己係偷渡,仲話以後唔會再搞書店。

不過去到6月中,失蹤7個多月嘅銅鑼灣書店店長林榮基就突然返港,爆出另一個故事,話自己失蹤係因為出版禁書而被內地扣押,形容書店5人失蹤唔止係書店嘅事,而係涉及港人自由,中國政府已逼到港人無路可退。但係李波又否認林嘅講法,兩人各說各話。

2016年農曆年初一發生咗一場警民大衝突,事件起源就係因為「篤魚蛋」。大年初一晚上至大年初二早上,有示威者因為不滿食環署處理旺角小販擺賣手法,同警員發生大型衝突,有警員兩度向天開槍示警,雙方喺深夜爆發「巷戰」。示威者向警方投擲垃圾桶、玻璃樽、磚塊等雜物,又喺多處縱火,事件釀成過百人受傷。政府定性事件為「暴亂」,有唔少人都譴責示威者暴力。大批涉事者被拘捕,部分人被控暴動罪,不過其後亦有部分人獲撤控,案件喺2016年間陸續審訊。

DQ(Disqualified,撤銷資格)呢個字,除咗喺運動比賽聽得多,估唔到成為咗今年政壇熱門詞。喺2月參加立法會新界東補選、拎到6萬幾票嘅本土民主前線梁天琦,本來想再次喺9月立法會選舉出戰,但被選舉主任認為佢主張唔擁護基本法條文,DQ咗佢無得參選。而喺9月選舉當選咗嘅青年新政梁頌恆同游蕙禎,因為宣誓時展示「HONG KONG IS NOT CHINA」旗幟,無得再宣誓,其後政府仲贏咗司法覆核,令梁游兩人失去議員資料,兩人上訴到終院,案件明年再審。

立法會選舉之後,當選議員朱凱廸懷疑因為揭露橫洲公屋發展涉及「官商鄉黑」,話受到死亡威脅,事件愈爆愈多,政府最終不得不解畫,承認曾經喺計劃發展期間同地區人士「摸底」,之後公屋數目就縮咗水,但政府無法提供「摸底」嘅內容,相信唔少人都真係摸不着頭腦。

特首梁振英12月宣布因為以家庭為重,決定唔參選下屆行政長官,消息震盪社會。講返梁振英嘅家庭成員一向都受到關注,其中佢囡囡梁頌昕嘅行李事件就係一例。有傳媒喺4月初報道梁頌昕3月底喺機場離港前,懷疑要求機場人員將遺在禁區外的行李代送到登機閘,其間特首曾經同航空公司人員通話,仲講咗句「叫我梁特首」,被質疑使用特權。但係梁振英同梁太與頌昕分別發表聲明,否認使用特權及向任何人施壓。

2016年尾梁振英宣布唔參選,而退休法官胡國興同前保安局長葉劉淑儀已經宣布角逐,計埋已辭職等消息嘅曾俊華,以及同仲諗緊去唔去馬嘅政務司長林鄭月娥,大家好似已經磨拳擦掌,特首選舉呢場2017年政壇重頭戲,Emily就同大家一齊拭目以待啦!

其他報道:【Emily Online】早前留醫威院 齊昕fb打卡指已到倫敦 網民籲保重

其他報道:【短片:網上熱話】網民拍片直擊大帽山山頭載逾10公斤垃圾營帳 斥無公德心者「不要再行山露營扮親親大自然」

其他報道:【Emily Online】兵捉賊靠「符碌」? 警察招募廣告引熱議

相關字詞﹕編輯推介

上 / 下一篇新聞