港聞

下一篇
上一篇

【Emily Online】楊岳橋化身漏口「毒男」探街坊 談安老照顧籲就公眾諮詢提意見 (15:19)

一向鍾意扮鬼扮馬、關心長者等民生議題嘅公民黨議員楊岳橋,拆禮物日就喺facebook上載新片,提醒市民政府正就「安老服務計劃方案」諮詢公眾,需要積極發表意見。

片段長逾6分鐘。有別平日西裝骨骨,楊岳橋今次以一頭亂髮示人,化身毒男嘅佢自稱「L墳」,佢話自己為咗脫毒,唔止參加漏口改進課程,仲下載交友程式扮女仔識人,成功約到人哋出嚟,先發現對方都係男仔,不知幾鬼失望。

片中「L墳」話直到一次見到電梯口有個資深毒男自言自語,佢先下定決心作出改變。睇見佢去到一個單位門口躊躇好耐,搞到Emily都好緊張,究竟去見邊個咁緊要呢?

原來佢去見一個早前遇到車禍受傷嘅街坊,街坊講起受傷後覆診等好耐,屋企人都話照顧時覺得吃力;對於政府話最好由仔女照顧番父母,街坊都話仔女自己都有頭家,要照顧屋企老人家都唔容易。

至於院舍服務,街坊就話睇到新聞都擔心入住後好似好無尊嚴。講到全民養老金,街坊大讚,但就話唔知點申請,結果「L墳」就講笑話而家仲未批出,笑指要搵特首梁振英追數。

最終「L墳」向街坊送上聖誕帽同暖包,名副其實聖誕送暖,佢仲鬼馬咁祝街坊「快高長大」,氹到大家笑開懷。

明明入屋傾偈都正正常常,「L墳」離開時打開大門遇見「女神」,又突然變番漏口仔,毒男表情再現,既傳神又搞笑。

片段最後楊岳橋都不忘提提大家,政府正就「安老服務計劃方案」進行公眾諮詢,2月6日就完。佢話呢個方案將影響香港安老服務嘅長遠規劃藍圖,叫大家如果關心老人家,就積極發表意見。

其他報道:【短片+多圖】聖誕襪內藏練習作業 小朋友黑面絕望:今天明明把作業做完……

其他報道:李慧琼指梁齊昕病情差 梁唐青儀批武斷感遺憾

相關字詞﹕編輯推介

上 / 下一篇新聞