港聞

【短片:Emily Online】黃碧雲監警會追問警隊形象問題 錢志庸:唔好阻我哋時間 (23:02)

今日開監警會會議嘅時候,監警會成員、立法會議員黃碧雲喺會上同錢志庸律師,就會上應該講啲咩野,有一段比較激烈嘅對話。

其他報道:【4天第3宗學生尋死】USB線纏頸 19歲女大學生大埔公廁上吊亡

當時講到警隊嘅「奮進行動」,行動其中一個目標就包括改變年青人對警隊嘅觀感。黃碧雲覺得,如果想做到呢個目標,得呢個計劃係唔夠嘅,應該要有其他計劃。佢話近幾年監警會做嘅民調可以睇到青年人對警隊同監警會都係有怨氣,而且愈年青同教育程度愈高就愈不滿咁話。黃碧雲話,監警會佢哋自己要檢討下,不過警隊都要諗吓點樣令到年青人對警隊有番一個正面嘅印象。

黃碧雲講完之後本來想警隊回應,點知主席郭琳廣就話自己提番少少相關嘅嘢先,不過講講吓就搞到黃碧雲忍唔住同主席講,希望可以畀警隊答問題。係呢個時候,錢志庸律師就出聲啦。

錢志庸話唔應該嘈落去同埋阻時間,黃碧雲同佢講,佢咁趕可以走先,錢志庸就答番佢其實佢大把時間,只不過係要嚟做「正經事」啫。黃碧雲之後都有話係傾緊正經事,不過錢志庸就覺得件事之前已經講咗唔係咁重要,同埋應該係鼓勵唔係批評。

兩個人來往咗幾次之後,主席最後打咗個圓場,叫咗警隊嘅代表答番黃碧雲嘅問題,事件先告一段落。

其他報道:【緊急呼籲】血庫存量嚴重短缺 紅十字會送「萬用掛袋」呼籲市民捐血

其他報道:【西貢擄人劫案】兩匪仍在逃 馬儉思未有上班 警到東港城金舖蒐證

相關字詞﹕編輯推介 監警會

上 / 下一篇新聞