港聞

【多圖:Emily Online之特首跑馬仔】曾俊華開IG 貼相放閃:老婆買的蘿蔔糕果然好食 (20:23)

日前話會積極考慮參選嘅財爺曾俊華,今日開咗Instagram(IG)帳戶,仲一次過出咗6張相,原來佢今日同老婆去咗工展會,仲喺IG貼相「放閃」添,認真羨煞旁人呀。

其他報道:邊個幫葉太設計「贏」字?

財爺IG帳戶名稱係「johntsangpage」,已經有近230個粉絲,但冇追蹤任何人,簡介就寫住:「只要有你們繼續與我同行,又何懼前路新挑戰?」

財爺貼咗6張喺工展會影嘅相,有幾張都係佢同市民合照,除咗有老人家同佢握手,財爺仲抱住個BB留影,唔知係咪藉此滿足「抱孫」嘅願望呢?佢仲特登寫下照片描述,話「感謝今天在工展會和我合照的每位熱情市民」。

不過,亮點其實喺另一張相至真,財爺同老婆行去一個攤檔幫襯,買咗一盒蘿蔔糕嚟食,佢仲賣口乖寫話「老婆買的蘿蔔糕果然好食」,真係識氹太太。

雖然帳戶開咗一日都唔夠,但係已經吸引網民留言,即使財爺未正式宣布會參選特首,已經有人話支持佢同埋叫佢加油,有人仲話「希望你可以成為下任特首」。

Emily今日之後都去咗工展會睇下,問問啲商戶,原來除咗嚟參觀嘅市民之外,連唔少喺度賣嘢嘅售貨員都有同佢「集郵」添。

財爺番到屋企之後,再喺IG上載咗一張相,展示晒佢今日嘅戰利品,盛惠830大元。Emily望過吓,財爺買咗幾張揮春、一大堆醬料、兩大包冬菇同埋湯包等等,唔知財爺係唔係用嚟親自下廚呢?

其他報道:報道指梁振英林鄭下周各自訪京

其他報道:形容03年辭職至參選特首是「臥薪嘗膽」 葉劉不憂被揭黑材料:搵唔到男友無緋聞

相關字詞﹕特首選舉 曾俊華 編輯推介

上 / 下一篇新聞