港聞

下一篇
上一篇

【Emily Online】邊個幫葉太設計「贏」字? (13:02)

新民黨主席葉劉淑儀噚日宣布參選特首,佢可能想一改過去作風強硬嘅形象,競選標誌上除咗出現較有少女feel嘅心心,仲拍咗唔少片放上網,表現佢親民、活力嘅一面,但部分網民就唔多受落,除咗改圖惡搞,仲話佢個字體唔整齊,設計師無心幫葉劉 Win back Hong Kong。

據Emily了解,葉太參選大會嘅「幕後玩家」原來係國際傳訊公司Mazarine AsiaPacific (众智亞洲),呢間公司由鄭詩韻主理,早前仲同何超瓊創立嘅天機公關合併,何超瓊噚日都有到場撐葉劉。

其他報道:形容03年辭職至參選特首是「臥薪嘗膽」 葉劉不憂被揭黑材料:搵唔到男友無緋聞

噚日係灣仔會展宣布參選特首嘅葉劉淑儀,繼續以9月參選立法會時嘅口號「贏返香港」(Win back Hong Kong)做主題,又沿用新民黨黨徽嘅藍、紅色做主調,但係網民似乎對於佢將個「贏」字拆做「吂」字同英文「win」字嘅設計就唔多喜歡,又話佢個「吂」字同「win」字無對齊,「win」字嘅「w」又唔知點解要用個調轉嘅「m」字代替,而「吂」字嘅擺位高過之後嘅「香港」,會令人覺得葉劉想贏多過想香港贏。

葉劉今朝去電台接受訪問時就話,有關設計係由年輕設計師負責。

而众智亞洲嘅負責人話,佢地主要負責噚日個活動流程,有關設計同新聞稿等資料就由葉劉嘅競選辦提供。Emily再打畀競選辦嘅有關負責人了解,佢就話整個宣傳活動同啲設計係由多方嘅人整合意見,無嘢補充喇。

众智亞洲其實來頭唔細,1993年開業至今,做開大品牌嘅廣告、活動策劃、設計同互聯網社交媒體傳播工作等等,翻查佢哋個網頁,佢哋嘅客戶通常都係時裝同奢侈品品牌,或者負責珠寶同藝術展,若講政治活動,就真係唔多覺。

Mazarine AsiaPacific (众智亞洲)無幾耐前先同信德集團董事總經理何超瓊創立嘅天機公關合併,而成立近30年嘅天機公關,係香港、澳門、北京、上海、廣州同深圳等地籌辦超過2000項活動,喺行內都可謂數一數二嘅大公司。

其他報道:【Emily Online】重用立會選舉口號好環保?葉太:好嘢唔怕再用

其他報道:葉劉有意邀「忠誠反對派」入內閣 點名指湯家驊不視釋法為洪水猛獸

相關字詞﹕特首選舉 葉劉淑儀; 編輯推介

上 / 下一篇新聞