港聞

【Emily Online】指葉劉喉住老闆份工早應辭職 田北俊:建制選委揀人提名難過揀特首 (11:25)

自由黨榮譽主席、特首選委田北俊(田少)今日出席港台節目,講到特首選舉,佢擔心緊有意參選嘅人拎提名票會難過上屆,又認為啱啱辭任行會成員嘅葉劉淑儀一早就應該辭職。

其他報道:姚松炎由大狀余若薇代表 梁國雄羅冠聰劉小麗皆自辯

節目進行期間適逢特首辦出稿話行政長官已經接納葉劉淑儀辭去行會職務,田少就話,佢呢幾年點可能做行會成員,「佢一直講話想選特首嘅,你想做特首嗰時,梁振英又無話唔連任,日日喉住你老闆份工嘅,你點可能喺入面做內閣架?佢應該一早就辭職啦」。

田少又話,葉劉辭職出嚟參選,要睇泛民會唔會提名佢,如果泛民唔提名佢,就剩低建制派嘅的選委會唔會提名佢,不過田少覺得,不論係對財政司長曾俊華、政務司長林鄭月娥或者葉劉嚟講,要拎到150個提名都相當困難。

點解呢?因為田少覺得,選委如果提名一個人,佢嘅決定會曝光,所以要有好多考慮,例如提名咗嗰個人唔知中聯辦或者中央會唔會唔高興,又正如上次選舉嘅啟示,如果提名嘅人輸咗,另一位贏咗,喺新行政長官管治下嗰幾年「無運行」,「梁振英將提名佢嗰305個當fans,689佢唔當fans架。」田少又話,如果公職人員想有更好嘅發展,都唔想得罪未來嘅行政長官,即使中聯辦有指示,可以俾3個人入閘,「但都想買中隻馬架?」所以覺得建制派方面嘅提名好困難,可能仲難過喺最後投票揀邊個做特首。

其他報道:接納葉劉辭行會 梁振英讚貢獻良多

其他報道:胡國興:不明為何林鄭想延續梁振英路線 此舉不會有人支持

相關字詞﹕田北俊 葉劉淑儀 行會 梁振英 編輯推介

上 / 下一篇新聞