港聞

【短片:Emily Online】迪士尼「鐵甲奇俠」遊戲下月開幕 玩家同Iron Man齊救香港 (16:41)

香港迪士尼樂園嘅「鐵甲奇俠(Iron Man)」設施下年1月就會開幕,迪士尼今日先請傳媒預覽,Emily留意到唔少遊戲都充滿香港元素。遊客可以喺「飛行之旅」入面,同Iron Man一齊並肩作戰保衛香港,另外仲可以同一比一嘅Iron Man真人面對面傾計同影相添!

其他報道:【Emily Online】商台主持指名字相似易叫錯 田少:讚就田北俊、鬧就田北辰啦

「鐵甲奇俠飛行之旅」(Iron Man Experience)係整個Iron Man設施嘅主打遊戲,玩家先要經過「史達科技展」參觀吓鐵甲Tony Stark多年嚟嘅發明,然後就準備登上「特別版鐵甲號」。呢個遊戲唔止坐定定咁簡單,玩家要扣上安全帶、戴住3D眼鏡,同Iron Man一齊經歷歷時4分半鐘嘅驚險之旅。鐵甲號會模擬喺香港上空飛行,由45位乘客同Iron Man一齊對抗外敵,當中鐵甲號會傾斜、急剎停等,都幾刺激架。

呢4分半鐘嘅故事入面,鐵甲號會由香港迪士尼出發,飛到位於西九龍嘅史達大樓(Stark Tower),沿途見到青馬大橋、環球貿易廣場(ICC)等地標,而經過嘅香港街景都好逼真,Emily仲見到的士、巴士,同好多香港特色燈箱。迪士尼話,漫畫Marvel嘅美國團隊早前派員嚟香港勘景,所以畫面先咁逼真。

另外遊客仲可以去到「鐵甲奇俠裝備展」一睹Iron Man真身,可以同佢傾計、影相。Iron Man會用英文同玩家溝通,似乎都識聽廣東話同英文,把聲同電影、動畫嘅Iron Man一樣架。Emily同Iron Man傾計嘅時候,Iron Man動作多多、好多嘢講,不過有時就會講嘢唔到題。

呢個以Iron Man做主題嘅遊樂設施,將於下年1月11日開幕,而今個月底就陸續開放畀特選會員試玩。

其他報道:涉超市偷蚊貼、喉片被揭發 女警否認盜竊 辯稱服藥不適未付款

其他報道:【宣誓覆核】指限期前申上訴至終院 游蕙禎:抗爭活動勢必回到街頭

相關字詞﹕迪士尼

上 / 下一篇新聞