港聞

下一篇
上一篇

【Emily Online】動議唔理謝偉俊譴責鄭松泰議案 慢必:國旗放低都唔得,要珍而重之直到佢自然分解? (16:10)

立法會議員謝偉俊動議譴責熱血公民鄭松泰,話鄭10月立法會會議期間,將其他建制派議員枱上的國旗及區旗倒轉,呢個議案今日喺立法會討論,人民力量議員陳志全喺呢個決定鄭松泰會否喪失議員資格嘅議案前,先動議「不付諸行動議案」,即要求立法會不得就謝嘅譴責議案採取任何行動。

相關報道:謝偉俊動議譴責鄭松泰倒轉國旗區旗 陳志全提動議阻行動

慢必話大家唔明白程序,以為今日會投票,其實係唔會嘅,因按程序都要先成立調查委員會,反而佢個「不付諸行動議案」就要先討論,因通過佢個議案就唔使浪費時間處理謝嘅議案。

慢必又批評謝偉俊小事化大及上綱上線,話佢「假、大、空」,即以假的指控,透過誇大鄭嘅行為,同埋空想堆砌理據以求達到褫奪鄭松泰由5萬名市民票選出嚟嘅議員席位,最終會令議會同社會進一步撕裂;又指建制派常批評他們拉布,話係濫用議事程序,其實呢次先算係。

佢又話覺得好奇怪,點解動議唔係國旗區旗物主民建聯提出而係謝偉俊提出,又話聽聞部分建制派其實都唔支持謝的動議,認為如成立調查委員會,物主先要交番啲旗出嚟,又質疑可否視當時建制派議員係棄置咗國旗喺議事廳,而鄭嘅行動究竟係倒插、收起定擺低,亦要視乎點演繹。

慢必其後反問,「其實上綱上線,講到連收起或放低國旗都可以係違反國旗法嘅,咁國旗就唔放得入垃圾桶,國旗一生產出嚟,就要珍而重之放直到佢自然分解為止?」

佢仲話如果收起、放入袋、壓埋一齊同棄置都違反國旗法,咁就好擔心立法會工作人員,並認為如要成立調查委員會,咁國旗生產者、派旗畀人嘅人都應該要做證人。

慢必又認為鄭松泰當日極其量係侮辱展示國旗者,而非侮辱展示品,仲話鄭參選毫不猶豫簽確認書,宣傳物又講永續基本法,可見佢對《基本法》係幾咁忠誠添。

其他報道:【Emily Online】商台主持指名字相似易叫錯 田少:讚就田北俊、鬧就田北辰啦

其他報道:【特首跑馬仔】曾俊華坐「FS」車到馬會 換車離開

相關字詞﹕編輯推介 陳志全 謝偉俊 鄭松泰

上 / 下一篇新聞