港聞

【Emily Online】馮煒光麥潤培fb爆罵戰 就建制泛民支持者有無收錢「賭人頭」 (18:52)

新聞統籌專員馮煒光下晝喺facebook,上載咗張佢老闆梁振英(CY)喺支持者包圍下嘅照片,仲形容相中CY擺出尤如劉華嘅動作,讚自己老闆「cute」。不過,勢估唔到呢張相會引發罵戰,民主黨前黨員、沙田區議員麥潤培留言諷刺CY要畀錢買fans後,雙方就「直接交火」、你來我往,仲係咁「大」對方要賭人頭咁話。

其他報道:港大民調:梁振英袁國強評分跌至上任最低

事緣馮煒光發布咗張相,係CY對住一眾舉晒牌嘅支持者,舉起食指、做「口殊」咁嘅手勢,形容「我老闆罕有被拍到的cute鏡頭」,仲話「有記者說:劉德華也好興咁」。

點知麥潤培就留言影射:「但劉德華啲fans唔洗(使)用錢買架喎……」馮煒光立刻不甘示弱,除咗刪除呢個留言,仲即時留言反擊話「麥議員,不要侮辱市民。從來是自發」、「做議員做得咁唔理性。這是我畢生追求的民主嗎」。

麥潤培態度都未有放軟,回應話「就係理性先知要錢」,馮煒光反過來話「原來泛民一向靠派錢才有群眾」、「我認識的建制派群眾從來都是自發」,但麥潤培隨即就貼咗條親政府團體被揭收車馬費嘅新聞片出嚟。

馮煒光雖然冇直接回應上述質疑,但火氣似乎繼續「升級」,問麥議員:「敢賭人頭嗎?假如你不能證明今天早上的群眾是收錢來的,請輸人頭。否則請不要污衊市民!」不過對方都回敬佢一句「馮專員,敢賭人頭嗎?假如你不能證明建制派所有行動的群眾是沒收錢來的,請輸人頭。」

帖文引來幾個網民留言撐CY同馮煒光,話自己係絕對係CY fans同「梁粉」,堅稱自己冇收過一分錢,係「憑良心企出來對抗洗腦的力量」。不過都有啲網民喺麥潤培fb留言,話自己留言質疑之後,畀馮煒光刪走晒。

其他報道:【宣誓覆核】梁頌恆游蕙禎將上訴至終院

其他報道:政府悼念南京大屠殺死難者 張曉明無出席

相關字詞﹕馮煒光 梁振英 麥潤培

上 / 下一篇新聞