港聞

下一篇
上一篇

【短片:Emily Online】旅發局新宣傳片群星拱照 潮服陳奕迅叫「Good Show」 劉青雲陪行山 (19:48)

旅發局今個財政年度獲財爺增撥超過2億港元,加強推廣香港吸客,最新一擊係拍咗4條全新嘅宣傳片,10月起喺內地、台灣、新加坡、韓國、日本、菲律賓、泰國等多個國家及地區播放,會一直播到農曆新年後,希望吸引更多遊客嚟香港。

宣傳片分「美食、夜生活」、「時尚、娛樂及藝術」、「家庭旅遊」及「自然美景」等4個主題,其中介紹香港時尚娛樂及藝術嘅一段,由本地新晉時裝設計師Anais Mak做主角,從深水埗布街行到太子金魚街至各區潮店,介紹香港時尚浮華嘅一面。

因為佢係陳奕迅演唱會嘅其中一個服裝設計師,所以片段到最後,連Eason都粉墨登場,佢仲着上Anais嘅衫講「Good Show」走上舞台添。

講到香港,當然不能不提美食,呢條片嘅主角係連續多年獲頒米芝蓮三星名廚Chef Umberto Bombana,佢又搭電車又去睇賽馬,從蛋撻雞蛋仔食到大排檔,佢仲話嚟咗香港廿幾年,第一句學識嘅廣東話,就係好好食添。

至於介紹香港大自然美景嘅片段,邀請咗劉青雲出山,由佢帶觀眾走訪香港享負盛名嘅綠色地帶,遊覽郊野公園景色同睇吓文化遺蹟。而最後一條就介紹家庭旅遊,王敏德同太太馬詩慧一家齊齊玩盡海陸空家庭旅遊景點,除咗乘坐中式帆船遊維港外,當然少不了去主題公園玩啦。

旅發局主席林建岳就話,構思宣傳片時唔想只sell購物或只播風景,因買名牌全世界城市都有,所以要講到香港嘅故仔,例如「時尚、娛樂及藝術」條片,係搵幫陳奕迅做歌衫嘅Anais Mak做主角,帶觀眾發掘香港時尚。

佢話劉青雲幫手嘅「自然美景」噚日仲拍緊,大讚青雲好認真,搵埋教練教佢點跑步跑得靚。至於點解搵青雲?林建岳就話,青雲喺內地同亞洲好紅,夠照。

林建岳仲話有斟周潤發幫手,初步發哥會幫手,但唔係今次宣傳,因全部明星都係拍膊頭唔收錢,所以要慢慢「碌卡」,咁大家就拭目以待啦。

其他報道:天順樓500萬工程質素欠佳 簽文件者與爛尾承建商董事同名

其他報道:最不滿意梁振英的事? 胡國興:橫洲摸底無紀錄好值得人懷疑

其他報道:無業漢認強姦錘擊前女友女兒 還押候判

相關字詞﹕編輯推介

上 / 下一篇新聞