新一屆立法會會期即將展開，據Emily了解，立法會秘書處今年為議員特別整咗一套新嘅電子表決系統。過往立法會不時出現投錯票，唔知新電子系統幫唔幫到議員減少失誤呢？
其他報道：被問「十誡」不懂回答 何君堯：我唔係咁虔誠嘅基督徒
議員以往透過控制面版投票，新安排下，控制面版保留傳譯同傳召服務員等功能，但議員座位就新增投票用嘅平板電腦，平板電腦除咗顯示表決按鈕，仲會顯示計時器、輪流發言人數、討論中嘅議案或表決結果、同過去50項表決結果等，可謂麻雀雖小、五臟俱全。新一屆議員日後開會時，就毋須再抬高頭望會議廳屏幕睇會議資訊。
不過，由於平板電腦以電線固定喺議員座位，唔可以隨身攜帶，所以議員仍然要出席會議先可以投票。
另外，立法會不時有不記名投票，據知，立法會秘書處同時更新立法會網站，讓公眾可以更快查閱不記名投票結果，投票結果會喺投票後更新，毋須等到會議紀錄完成後先見到。