港聞

【Emily Online】《dbc主場》最後直播 主持人最難忘係容海恩? (20:25)

香港數碼電台廣播(DBC)上月公布因發展未如理想,決定向政府交還牌照,113名員工今日Last day,傍晚嘅時政節目《dbc主場》,今日就特別預留最後1小時,畀主持人講講難忘事,點知原來不少主持,都對新科立法會議員容海恩,留有深刻印象。

其他報道:指周永勤棄選說法奇怪 曾鈺成:點解勸接近零支持度的人棄選?

其中李華明話,原來曾有兩次同「又靚女又好鬼高」嘅容海恩合作,女方幫忙做義務客席主持,兩人拍檔做節目,嗰次無嘉賓又唔多現場訪問,「咁主持人都要吹吓」,因自己最終要唱獨腳戲,所以記憶好深刻。

其他主持人即笑問,佢係咪話容海恩係花瓶,李華明直認不諱,話當時雖然對方無透露參選之意,但已覺得「此女子非池中物」,而且明顯同建制派較親近。李華明仲形容,對方喺社會議題上好似一張「白紙」,因為佢咩都唔講,為想佢開口講吓嘢,就叫做律師嘅佢講吓法律意見,點知佢都係唔講,「所以我都搲晒頭」。

李華明話,都有睇對方參與選舉論壇,覺得表現麻麻,話佢成日話要修改議事規則抗拉布,點知人哋問佢邊條就唔答,只係話人哋一定反對,講都嘥氣,「你咁Sell,咁重要政綱,咁即係邊條先?」

另一主持人許禎亦接口,話有次容海恩出席佢嘅節目,對方當時代表一個鼓勵年輕人創業組織,許禎話,按自己經驗唔特別鼓勵年輕人創業,因除資金外,伸有好多其他因素如性格等影響,所以就問容海恩,點解咁鼓勵年輕人創業呢,點知「佢唔係無創業經驗,佢係無返工經驗!」

許禎話,當時都有問容海恩平日法律工作做啲乜,接商業工作多定民事工作多,雖然佢不停問容海恩問題,點知容都係答唔到,令佢都覺得好奇怪。

其他報道:【選戰後】朱凱廸指推動農業前方有三大山:港人食返自己的菜都不簡單

其他報道:【雷動計劃】戴耀廷:取30席已達目標 認低估情況需檢討

相關字詞﹕編輯推介

上 / 下一篇新聞