港聞

【Emily Online之特首跑馬仔】財爺G20再獲習握手 (22:55)

喺浙江杭州出席二十國集團(G20)峰會嘅財政司長曾俊華話,佢噚晚有喺晚宴上同國家主席習近平傾偈,但主要係感謝習主席,邀請佢作為中國代表團嘅一員參加峰會,但至於習主席同佢他講咗咩,財爺就唔肯透露,話「你哋去問佢(習近平)。」不過,據Emily了解,「習握手」嘅一幕,原來喺噚晚重演。

其他報道:【立會選舉】新一屆立法會全面睇 70議員當選名單及得票

「習主席是東道主,當然見過佢好多次」,曾俊華今晚見傳媒時講,噚晚在晚宴期間,與習近平談話,但只傾與G20有關嘅事,佢又恭喜習近平會議開得好成功,感謝習主席支持香港參加會議。

據知,噚晚習主席筵開多席,宴請各國元首及與會各國官員,當時財爺安排坐喺遠處一枱,同台有財政部官員同其他國家官員,臨近尾聲,習主席離場,全場賓客起身歡送,此時習近平途經財爺嘅一席,然後停下,主動同財爺傾談,仲再次同財爺握手,然後先離開。據知,二人主要傾G20嘅事,唔係講特首選舉。

財爺今日被問及對選舉嘅看法時,曾俊華樂見多人出來投票,反映大家盡作為公民嘅責任,又稱自己只睇到部分選舉結果,仲未有時間詳細分析,希望能盡快與新議員認識、建立工作關係及溝通途徑。有記者問佢,同本土派嘅溝通會唔會困難,佢回應話「唔好太多擔憂」。

對於選舉結果會否影響佢參選下一任特首嘅想法,曾俊華就再次重申,自己嘅想法「如上」。曾俊華話,自己喺G20峰會上見咗南非、加拿大及德國嘅財長,明日將返回香港。

其他報道:【短片+多圖】葉劉座駕入中聯辦 後座全黑布遮蔽 逗留50分鐘離開

相關字詞﹕編輯推介 特首跑馬仔

上 / 下一篇新聞