港聞

下一篇
上一篇

【Emily Online】網民稱明晚帶午餐肉賀王國興落選 指「慶祝完就做局長」 (22:11)

昔日喺立法會「日以繼夜夜以繼日」開會,兼頻爆金句嘅工聯會議員王國興,喺今屆立法會出戰區議會(第二)功能界別,佢話自己已經使盡「洪荒之力」拉票,又批評泛民陣營「圍標選舉」手法,佢最終獲得233,236票排第6,無緣晉身立法會。

相關報道:稱對得住香港市民 王國興:最大敵人係王國興自己

王國興失落議席當然唔開心,投票畀佢支持者嘅亦十分失望。而王國興就話「對得住香港市民」,未來會喺其他平台繼續服務市民。

網民就喺facebook成立「全港各界熱烈慶祝王國興落選委員會」專頁,話聽晚7點,要去柴灣小西灣邨瑞益樓地下,即係王國興議員辦事處慶祝。有網民提醒參加者要帶備午餐肉,截至晚上10點,已有超過800人話參加。而同一時間,高登討論區亦有人號召聽晚8點去香港仔華富邨華安樓地下,即王國興另一辦事處慶祝,同時有兩個地點,網民都烈熱討論去邊度都好,又話一定要帶啤酒花生,同埋播小鳳姐啲歌。

另外,亦有潮服店借王國興落選搞宣傳,形容佢係「政壇潮人」,喺fb發帖指「慶祝日以繼夜,夜以繼日辛勞工作嘅王國興先生終能放下立法會議員嘅身分」,乘機推出賣鞋優惠,尋找商機做生意。

有理性網民就提醒大家唔好咁開心,因為根據上屆「敗者為王」嘅劇本,輸家隨時變大贏家,仲有網民話「慶祝完佢就做會局長」。話說,上屆民建聯劉江華喺超區尋求連任失敗,當時都有唔少網民「熱烈慶祝」。但劉江華後來獲特首梁振英賞職,邀請佢加入政府成為政制及內地事務局成為副局長,到2015年更接替民建聯創黨主席曾鈓成弟弟曾德成,坐正做咗局長,月薪跳到近30萬,較原本月薪2.2萬嘅區議員,收入暴增接近14倍,至今仍然係網民傳頌嘅「勵志故事」。

王國興同午餐肉嘅關係,就源自2015年5月立法會拉布戰,當時王國興出動「9999純金剪刀」促請主席曾鈺成盡快剪布,仲帶咗6張大海報解釋拉布一日浪費255萬公帑,話呢個金額夠買16.4萬罐午餐肉,或者12.8萬罐豆豉鯪魚。

相關報道:【短片】王國興:搏盡老命拉票 無資料顯示被「棄保」

其他報道:陳云根fb發文:永續基本法是真港獨 稱可在美國支援下執行港獨議程

其他報道:【短片+多圖】葉劉座駕入中聯辦 後座全黑布遮蔽 逗留50分鐘離開

其他報道:今屆立會選民多30萬 長者增兩成至110萬 66至70歲選民激增六成

其他報道:【立會選舉】新一屆立法會全面睇 70議員當選名單及得票

相關字詞﹕編輯推介 立法會選舉

上 / 下一篇新聞