港聞

下一篇
上一篇

【Emily Online:選舉論壇】陳玉娥突然話「CY就係太完美」 全場嘩然 (10:01)

立法會選舉進入最後直路,唔少新丁候選人經過一個月宣傳期,都開始為人熟悉,就好似力撐梁振英(CY)連任嘅新界東候選人陳玉娥,早前喺Yahoo「最熱搜」候選人排第一,唔知係咪同佢論壇嘅表現有關呢。

其他報道:2016年立法會選舉候選人名單

呢位「網絡紅人」今早在商台選舉論壇又再發功,每次佢發言都引來唔少候選人大笑。喺候選人主場質詢環節,陳連珠發炮「質詢」4個非建制派候選人。首先佢批評青年新政梁頌恆及無填寫政治聯繫嘅梁金成,話佢哋「踩貓尾」,利用港獨議題製造矛盾及搞分化。

其後佢譴責民主黨林卓廷「生安白造」,抹黑梁振英,講歪理誤導市民。當佢講到一句「CY就係太完美」,全場頓時嘩聲四起,不過佢繼續批評「你翻炒冷飯,用UGL過氣事件呃選票」。

最後佢再批評社民連梁國雄「最無恥」,長期拉布狂燒納稅人嘅錢,「香港唔係畀你抽水掉嘢」。

當陳玉娥連珠發炮期間,主持多次提醒呢個環節係要質詢候選人,但未被理會,後來主持再問「候選人會唔會比人哋回應?」陳玉娥隨即回答「唔畀」,令全場第二次起哄,主持唯有提她「你可以細聲少少,聽到咖啦」。

陳玉娥喺過往眾多選舉論壇,都表明支持梁振英連任,今次亦唔例外,開場嘅必答題已經講明參選係要「撐CY連任,反拉布」,而喺主持質詢環節就被問到「CY有冇多謝過你」時,佢就答「我覺得唔需要,我真係為香港人服務」。

其他報道:【選舉論壇】立會結果對梁連任有何影響? 楊岳橋:愈亂對梁愈好 葛珮帆:議員職責非選特首

其他報道:路透社:中央向港府施壓 要取消倡港獨6候選人資格

其他報道:陳玉娥「譴責」長毛索其相片放牀頭 長毛否認:呢個係我清譽

相關字詞﹕立法會選舉 特首跑馬仔

上 / 下一篇新聞