港聞

 【Emily Online】Pokémon Go唔止玩得仲聽得 Spotify搞專屬歌單下載量爆升 (00:00)

Pokémon Go今年7月底殺入香港嗰陣,人人衝落街捉精靈嘅情境,相信大家都仲記憶猶新。原來Pokémon Go唔止玩得,而且仲聽得,hit到連音樂數碼串流服務都受惠!

相關報道:受Pokémon GO啟發 比利時校長設計野外尋書遊戲爆紅

Emily上周二見到Spotify嘅亞洲總監Sunita Kaur,佢話自從Pokémon Go出台到而家,全球59個有Spotify嘅國家同城巿,下載Pokémon Go歌單(Playlist)數量升咗362%,佢見到個總數都嚇咗一嚇。

Sunita話,最初見到好多人喺Spotify搜尋音樂嗰欄打Pokémon Go,所以就整左張Pokémon Go歌單畀用戶下載,點知下載人數一直升,依家比最初推出時升左3倍半,估計仲會繼續升添﹗

佢話將大家鍾意嘅歌,組合埋一齊做一張歌單好有用,例如唔少用戶跑步嘅時候都鍾意聽歌,Spotify就整咗張專比跑步用戶聽嘅歌單,最特別係呢張歌單會根據用戶跑步嘅步速,自動揀適合用戶嘅歌曲,即係如果跑手嘅步速唔算快,系統就會播歌單入面較溫和嘅歌,如果跑快啲就會自動轉首快歌。

講返香港嘅用戶,Sunita話大約每4個香港人,就有一個係Spotify客仔,而香港人聽歌習慣都好特別,星期一至五要返工返學嘅日子,原來傾向聽啲流行音樂、電子舞曲,即係激昂啲、有活力啲嘅歌,相反去到星期六、日放假,大家就會轉聽鬆弛啲嘅音樂,以慢同溫和曲風為主。

Emily追問點解,Sunita笑住話佢都想知,認為話唔定係香港人工作壓力太大,返工時候要多啲能量。咁究竟實情係咪咁呢?大家不妨留意吓自己嘅聽歌習慣啦。

其他報道:iPhone保安漏洞 可遭遙控 疑政府監控異見者 蘋果急更新

其他報道:【駐京周記】「Pokémon GO」山寨版 粗糙仍流行

上 / 下一篇新聞