港聞

【短片+圖輯:Emily online】男女大力士獨力拉郁8噸貨車 阿諾紙牌老是常出現 (18:44)

一個人要幾大力,先至可以拉得郁一架重8.7噸嘅大貨車?由「大隻佬」影星、美國加州前州長阿諾舒華辛力加發起嘅「阿諾國際體育節」本月中將首度在港舉行,大會為活動率先熱身,邀請咗兩名大力士,各自獨力拉動8.7噸嘅大貨車,其中一位仲係女大力士𠻹。

其他報道:邊跳邊笑 漁民之子奪世界冠軍

男大力士Gary將繩索綁喺貨車頭,自己揹起繩索,手拉住綁喺另一輛貨車嘅粗麻繩,一鼓作氣拉郁8.7噸重嘅貨車,仲拉咗成10米咁遠。Gary話起步係最困難,「不過一拉郁咗架貨車,之後就靠貨車自己嘅動力向前移,自己就唔駛出咁多力」。見Gary手臂肌肉非常發達,拉車時青筋盡現,原來佢係一名居港英國人,仲喺香港開設健身室𠻹。

女士亦都不甘示弱,女大力士Santina同樣都拉到10米距離,佢拉完之後覺得前臂有啲刺痛,不過仍然為成功挑戰到感到好開心。原來今次係佢哋兩位第一次拉貨車,佢哋平時做訓練時,都係拉動200至300公斤嘅沙包、車胎居多,「不過沙包與地面磨擦力大,與拉貨車有不同。」Gary說。

Emily仲喺現場見到阿諾老是常出現,並唔係講緊阿諾真人,而係現場有大會工作人員不停舉住阿諾嘅人型紙牌博上鏡,場面都幾搞笑。

「阿諾國際體育節」將於8月19至21日喺香港亞洲國際博覽館舉行,大會預料會有4至5萬港人參與今次體育節。活動嘅成人票價由150港元起,18歲以下及全日制學生票價就由80元起,12歲以下小童免費入場,市民可以去活動網頁查詢更多門票資訊。

其他報道:梁振英否認「無朋友」 不介意fb多「嬲嬲」

其他報道:再有人深圳打肉毒桿菌中毒 兩個月10宗

相關字詞﹕阿諾國際體育節 大力士

上 / 下一篇新聞