港聞

【Emily Online】政府新聞網fb登招聘廣告讚「好工」 網民:洗唔洗簽確認書? (22:28)

政府新聞網今晚喺facebook登出招聘廣告,吸引有興趣人士應徵政務主任(AO)等多個職位,仲話明係份好工嚟添。不過唔少熱心網民留言「查詢」時,問到「洗唔洗簽確認書?」暗諷日前選舉主任被指未有法律依據下作政治篩選,令本土民主前線梁天琦等人冇得入閘一事。

其他報道:濕地倒泥兩人罰1.5萬 公帑修復料花600萬

嗰篇fb帖文話,政府9月請人,包括政務主任(AO)、二級行政主任(EOII)、二級助理勞工事務主任(ALOII)、二級助理貿易主任(ATOII)及二級運輸主任(TOII),不過要先考綜合招聘考試及基本法測試,仲落咗「#全港最大僱主」、「#服務七百幾萬香港市民」等標籤。

帖文一出,網民反應都好踴躍,立即留言詢問:「洗唔洗簽確認書?」、「有無得做篩選...呀sorry....選舉主任?」、「工作內容係咪包括篩選下人咁?」、「我認為、我相信、我唔相信。係咪識講呢幾句就請?!」字裏行間好有骨,似乎暗諷幾名立法會選舉參選人被拒入閘一事。

有人亦將矛頭指向其他高官,留言話「請問成功入職成為政務主任之後,可否合法經營劏房、囤地、套丁等等?升官發財、攀附權貴,均是本人自小以來的志願。」Emily就覺得,呢啲問題真係考起政府新聞網fb嘅小編喇。

其他報道:梁振英談雙曾:歡迎競爭!如果我參選嘅話!

其他報道:最高檢轉發批港獨片配黃之鋒畫面 黃:多謝黨中央對我的關注

相關字詞﹕立法會選舉 熱話 編輯推介

上 / 下一篇新聞