港聞

【Emily Online】曾鈺成大爆CY教路 「魚缸理論」避記者 (18:16)

立法會主席曾鈺成近日愈來愈風騷,喺其報章專欄不時抽特首梁振英(CY)水。一眾記者今日趁立法會會期完結,一齊請曾主席食飯,風花雪月之餘亦要聽佢論盡政事,話題當然離唔開CY。曾主席就大爆CY早年曾醒佢一招避開記者嘅「好橋」。

其他報道:莊偉忠加盟康宏網民唔Like 質疑「退休論」借老婆過橋

曾主席話,自己認識CY多年,覺得佢喺約2011年時準備選特首,對記者嘅態度就完全改變,曾主席仲同記者分享一段陳年往事,佢話回歸前經常要上北京開籌委會,遇到記者追訪,唔少委員都好頭痕,當年曾主席、CY、劉兆佳同鍾士元4人不時食完飯後散吓步、吹水咁,有次CY就同佢哋講「魚缸理論」以應付記者。

曾主席憶述,CY同佢講屋企內有缸魚,分別有大魚同細魚,大魚經常去咬細魚,於是CY就放塊玻璃喺兩堆魚中間阻隔,雖然大魚見到細魚,但一游埋去就會撞玻璃,撞多幾次知驚,拎返開塊玻璃,大魚都唔會再游去細魚度。曾主席仲引述一名回歸前已入行嘅記者遭遇,該名記者曾經畀卡片CY,但CY就當面將卡片扔落垃圾桶,仲話明自己「無嘢要搵你」。曾主席話,聽完CY嘅理論,都大讚對方「高!」

講開CY性格為人,曾主席就笑稱,有個醫生朋友係研究「亞氏保加症」嘅,曾經就同佢講,以佢判斷,CY肯定有「亞氏保加症」。亞氏保加症係自閉症嘅一種,病徵包括說話平板,缺乏抑揚頓挫、行為固執、不會主動參與群體活動等。

其他報道:首就特首選舉表態 李慧琼周浩鼎:一定支持曾鈺成

其他報道:梁振英曾鈺成曾俊華特首三選一?港島區參選人表態

相關字詞﹕特首跑馬仔 編輯推介

上 / 下一篇新聞