港聞

【Emily Online:妮妲殺到】新聞處FB提「李氏力場」 網民:官方承認了? (15:09)

颱風「妮妲」逐漸迫近本港,目前係3號波,天文台仲話考慮傍晚6至10點改發8號烈風或暴風信號。市民當然好關心天氣狀況,政府新聞處就喺ffacebook專頁「溫馨提示」天文台最新預報,但最後一句「李氏力場今次會唔會發揮作用呢?」就引起網民熱議。

其他報道:【不斷更新】颱風天特別安排一覽

「李氏力場」係一個網絡惡搞用語,每次打風都會出現,用嚟埋怨天文台明明好大風大雨仍然唔掛8號風球,令全港市民要照常返工返學,質疑隸屬商經局嘅天文台偏重商界利益,暗諷首富李嘉誠的力場比強颱更犀利。

政府新聞處今次呢句「李氏力場今次會唔會發揮作用呢?」令到網民好大反應,有人話「原來李氏力場係真架」、「官方承認官商勾結?」,亦有人笑fb管理員係咪唔知咩叫「李氏力場」,勸佢準備搵過第份工,又批評係公關災難。不過,都有人幫管理員講句「都係想搞下gag啫,香港人放鬆下啦」。截至目前,專頁呢個帖出咗兩個鐘都未修改,唔通管理員今次「企硬」?

網民留言:

--官方承認有李氏力場?

--官方承認官商勾結?

--小編我驚你飯碗不保

--FB admin準備搵個第份工啦

--寫稿嗰個想製造關公災難

--admin都係想搞下gag姐... 香港人放鬆下啦...

其實,天文台近年已經多次就「李氏力場」澄清,指絕對冇「李氏力場」呢回事,考慮發出熱帶氣旋警告信號主要係睇公眾安全,唔包括經濟因素。

其他報道:近百航機取消 國泰港龍今晚10時至明午2時停飛

其他報道:現掛3號波 下午6-10時或改發8號

相關字詞﹕編輯推介 打風 李氏力場

上 / 下一篇新聞