港聞

【Emily online】再被問參選否 財爺一臉無知反問「選乜嘢」 300學生拍掌喊「一定得」 (17:47)

財爺曾俊華喺商台噚日播出嘅《雲常開》節目中否認講過唔選特首,又話「如果對香港有貢獻,我願意做」,隨即惹來備選特首疑雲。財爺今日出席一個活動時,就三度被問到會唔會參選特首,佢冇再正面回應。不過,在場嘅學生睇嚟就好支持財爺啦,除咗熱烈鼓掌之外,仲大叫佢「Never give up(永不放棄)!一定得」。

電台節目主持麥潤壽(麥Sir)今日舉辦「永不放棄同學會畢業禮」,邀請財爺擔任嘉賓。麥Sir似乎同Emily一樣咁關心財爺係咪要參選特首。麥Sir喺致辭時就話,好高興財爺喺百忙中擔任嘉賓,話佢除咗要忙財爺工作之外,仲要準備參選,忙上加忙,又講笑咁話財爺可能會好似美國總統候選人希拉里咁,上台宣布參選特首。財爺隨即企起身面向在場超過300名學生,將手攤開,一頭霧水咁嘅樣,學生都隨即熱烈拍手歡呼。

麥Sir其後再喺台上直接問財爺係咪參選,財爺一副「無知」樣咁問「參選乜嘢?」麥Sir都好風趣咁話「參選區議員」,又話「聽聞好多人話財爺要參選特首」,財爺都係一副無知樣回了一句「係咩?唔太覺得喎」。財爺始終都無承認係咪打算參選,麥Sir隨即叫在場300名學生一齊做手勢叫財爺「Never give up! 一定得」。

麥Sir見財爺始終都無表態,其後就提醒佢如果真係參選,要小心啲,因為聽人講話政治好黑暗,小心被人篤背脊。財爺就笑笑口話,如果畀人篤背脊,都唔識點擋,因為(劍擊)師傅無教,仲話唔知自己死穴喺邊。財爺最終離開會場時,都無點回應到Emily問佢係咪備選特首,仲話喺會場入面答晒喎。

相關字詞﹕編輯推介 特首跑馬仔

上 / 下一篇新聞