港聞

【Emily Online】TVB噚晚無播體育新聞 馮堅成:分半鐘都唔係阻好多時間啫 TVB:新安排有彈性 (19:42)

噚晚TVB《晚間新聞》得返主播藍可盈坐喺度,但過往慣例夜晚都係新聞主播同體育主播齊齊坐陣,而且觀衆亦發現成晚都見唔到有報體育新聞,大家都忍唔住問,唔通悄悄冇咗?

其他報道:自閉童統一試不及格 學校反寫信稱讚多才能:測驗只量度了你的小部分

早前報道南美洲自由盃分組賽抽盡時事熱話、被網民譽為「新一代抽水主播」嘅前TVB體育記者姚雋彥,雖然5月已離職,但都好留意舊東家,佢噚晚半夜喺Facebook貼文話「二缺一,很心噏」,又話「抱歉沒能力把關至最後,讓區區分半鐘的你悄悄地被消失。」令唔少網民揣測究竟TVB喺咪打算繼2010年取消《6點半新聞報道》的體育新聞後,再取消埋周六、日的晚間體育新聞。

早前離開TVB嘅資深體育記者馮堅成同Emily講,佢噚晚無意中睇到新聞片段,發現主播台度少咗個人,都覺得「怪怪哋」同埋「個心嗱住嗱住」,佢話唔明白點解會冇咗體育新聞,心諗分半鐘都唔係阻好多時間啫,仲話其實平時星期六、日先多好睇嘅體育新聞添。

Emily都有打探吓馮堅成知唔知點解噚晚冇體育新聞,佢就話唔猜測原因,但認為應該唔關人手事。

咁如果夜晚真係無埋體育記者,馮堅成估計TVB可能會轉為由新聞主播照稿讀出體育新聞,不過佢就覺得如果換咗人就咁讀,會冇咗嗰種味道,仲話平時啲觀衆一見到個體育主播就知喺體育時段,大家都會投入啲喎!

唔少網民都係網上留言問發生咩事,亦有人話「心水清的網友應該估到背後的用意。」

Emily聯絡咗TVB公關,獲回覆話呢個係晚間新聞的新安排,唔設特定體育環節可更有彈性,但如有重大體育新聞時都會適當報道。通訊事務管理局辦公室就話,牌照冇規定新聞節目內容必須包括體育新聞喎。

其他報道:【短片:最後心願】95歲老英兵欲與古董戰機再聚 女兒拍老父望飛機背影照上載fb 有心機場主管助圓願

其他報道:悟生命無常 男友圓90後抗癌少女遺志出書 勉迎痛苦者:你並不孤單

相關字詞﹕編輯推介

上 / 下一篇新聞