港聞

【Emily Online】前CEO透露海洋公園大計 擬無票入場亦可歎晚餐 (18:15)

海洋公園啱啱換咗新行政總裁,卸下重擔嘅苗樂文(Tom)不改「工作狂」本色,今日同傳媒飯敘,開到聲話享受工作、個人好難慢落嚟,所以只休息兩個月,9月就會正式開公司做顧問,第一名大客當然就係有12年感情嘅舊東家——海洋公園啦!佢透露嚟緊海洋公園會有大計,有機會唔使買飛入園,都可以喺園內餐廳食晚餐。詳情佢就賣關子,園方最快下星期公布。

其他報道:網民疑行山徑鋪雲石易跣腳 裝修業者料為麻石 指雲石易碎不宜鋪戶外路

Tom同現任CEO李繩宗除咗同樣熱愛工作,仲一樣咁注重健康。Tom話,幾年前有個同事心臟唔舒服,令佢覺得要鼓勵下大家維持良好生活習慣,於是安排高層配備運動手帶,咁就可以時刻留意住有無做足夠運動啦。好似Tom咁,每日平均行2萬步咁多!話口未完,同場嘅營銷執行總監梁啟誠就攞出隨身嘅手帶,今朝到食飯行咗大約4000步,成績都唔差㗎。

做咗12年CEO,Tom一直都受到下屬敬重,佢離職大家都好唔捨得,特登設計咗「卡通版苗樂文」做歡送禮物,極具神髓!畫中另一主角威威獅令,都有現身同佢合照留念。向來玩得嘅Tom,仲預告今年萬聖節「哈囉喂」會繼續扮鬼扮馬,小心唔好畀佢嚇親!

其他報道:「勁揪體」網絡眾籌達標 設計師Kit Man坦言「不知所措」 盼盡快投入造字

其他報道:【文憑試明放榜】整體成績勝去年 22分料夠入大學

上 / 下一篇新聞