港聞

【Emily Online】王維基一起身未刷牙做FB Live 「瞓身」澄清政綱爭議 (10:01)

香港電視主席王維基昨日正式宣布參選立法會港島區直選,仲上載咗100頁政綱,但當中有啲政策建議引起爭議。王維基今朝8點幾未落牀,就喺Facebook直播,話「有野(嘢)要講清楚」,澄清政綱中的主張。

其他報道:【王維基參選】王:自己一切皆香港給予 不應看港沉淪 信港人同樣「不死心」

王維基瞓喺牀上做咗約5分鐘直播,佢話自己未刷牙洗面就要講清楚,因一起身就見到有傳媒誤解咗佢,話佢贊成開發郊野公園。佢就解釋返只係提出7種供應地嘅方法,認為大家都住得好辛苦,又唔夠地方住,所以香港人要一齊去傾有咩方法起樓,但咩都唔掂就會「攬炒」。佢又話「我個個禮拜都行山,點會贊成拎郊野公園地起(樓)?」

佢直播時間正值大家趕住返工返學,但都吸引唔少網民留言打招呼講早晨,亦有人認真提出意見,王維基都一一回應。有人問係咪一瞓醒就有靈感做直播,王直認噚晚瞓唔着,今日會再就大家嘅誤解進一步釐清。

有網民喺直播後笑言「牀片流出」,又讚「瞓喺度發言好犀利」,Emily就覺得呢個方法可能仲直接過「落區」,隨時隨地一起身就聽到市民意見,唔知其他候選人又會唔會嘗試呢?

其他報道:辣媽CEO:7個失敗教養的負面行為

其他報道:用戶唔裝Moments facebook本周四刪所有同步相

相關字詞﹕立法會選舉 編輯推介

上 / 下一篇新聞