港聞

下一篇
上一篇

【Emily Online】深航客機低飛掠過大佛 寶蓮寺fb:睇大佛唔使用飛機嘅,走上260級樓梯就可以 (23:10)

深圳航空一架A320客機日前降落香港國際機場時,復飛時冇遵照本港航道,唔單只喺天壇大佛旁掠過,仲比安全高度低1300呎,即係約莫396米,唔少人都批評機師此舉「牙煙」,擔心容乜易就撞埋大佛度。寶蓮寺今日喺facebook出post,就話「要欣賞莊嚴大佛,唔駛(使)用飛機既(嘅),走上260級樓梯就可以啦!!」Emily都好認同呀。

「寶蓮禪寺」fb專頁今朝貼咗張莊嚴大佛相出嚟,叫大家行上樓梯觀賞,唔使靠飛機咁話,似乎意有所指。

唔少網民心領神會,聯想到深航事件,笑言「機師個牌應該係淘返嚟?」,又話「轉臥佛穩陣喎」,亦都有人覺得有危險嘅係飛機先真:「得罪咗方丈想走?飛機都打埋你落嚟」。另外亦都有人對寶蓮寺抽水感到意外,話「估唔到寶蓮寺都會抽水」、「方丈真係與時並進」。

雖然Emily同好多人都一樣,覺得深航唔跟指引飛行實在太危險,不過民航處今日就話,航機冇同其他飛機或建築物碰撞嘅危險,亦未對公眾安全構成威脅喎。

其他報道:【短片】內地「00後」女童拍炫富片 原來係諷刺不良炫富風氣 網民大讚演技到位

其他報道:深航客機偏離航道低飛掠過大佛旁 民航處:未對公眾安全構成威脅 已即時跟進事故

相關字詞﹕深航 編輯推介

上 / 下一篇新聞