港聞

【Emily Online】本為理科人 石永泰稱「讀到冇嘢好讀」才選法律 (12:38)

好多人都認為律師係一份充滿熱誠嘅工作,但本身係資深大律師嘅大律師公會前主席石永泰就笑言自己非因熱誠而踏上法律路,只係「讀到冇嘢好讀」。

其他報道:曾鈺成又玩文字遊戲 「HUGELY CUNNING」「SPRANG A JEST」講邊個?

石永泰接受商台節目《雲常開》訪問時講到,自己理科出身,嗰時男仔好興讀醫或者工程,所以佢讀到中五都仍然立志讀工程,雖然當時附加數學科都「聞到有燶味」,考模擬試仲「肥佬」,但喺佢狂操歷屆試題之下,最後都攞到A,但升到中六繼續讀數,就發現係完全另一回事。

由於數學唔掂,又唔想讀醫,佢話「讀到冇嘢好讀,中學有玩過辯論,死剩把口,英文唔差」,加上法律唔需要中學學科底子,所以就選擇咗法律系。

升到英國劍橋大學讀法律系嘅石永泰話,自己係一個理科底嘅人,一開始以非黑即白嘅心態讀,後來遇到衝擊,發現法律原來無對錯,「明明兩個同學講嘅嘢都唔同,但導師讚兩個都係good point」,自言嗰時好「騰雞」,唔知點先及格。另外自己對好多政治術語同英國政府架構等都矇查查,「一啲常識問題都唔識,發現自己好無知,完全唔知佢哋(同學)講乜」,又試過冇準備導修課畀導師鬧,所以第一個學期都好低落,覺得鬱鬱不得志。

不過隨住學期過去,雖然第二個學期都冇特別開竅,但慢慢就知道讀法律唔使咁執著,而係「睇吓你講嘅過程,合唔合理」。

其他報道:梁振英指3方面跟進林榮基事件 即日函中央表達港人關注顧慮

其他報道:移交林榮基? 黎棟國:據香港法律處理內地要求

相關字詞﹕編輯推介

上 / 下一篇新聞