港聞

【Emily Online】證實fb留言讚李梓敬 田少:唔知點解留言後個樣變咗 自爆有幾個「田毛毛」 (00:41)

自由黨青年團主席李梓敬個人facebook專頁日前出現咗「自己讚自己」嘅笑話,喺一段講述假難民問題短片下,出現一個「李梓敬 Dominic Lee」用戶嘅留言,大讚佢講得好,而下款就係「田」字,相信指嘅係自由黨榮譽主席田北俊,惹來網民留言嘲笑。李梓敬其後解釋田少係佢fb管理員,用手機留言讚佢時,無換帳戶先變成「李梓敬讚李梓敬」。

相關新聞:【Emily Online】李梓敬化身「田先生」fb自讚講得好 未轉戶口變自like 網民笑爆:精神分裂?

自稱玩fb唔叻嘅田少,被Emily問到事件時,笑言佢其實到宜家都仲係唔太清楚發生咩事,佢話留完言見到出現個頭象,竟然唔係自己而變咗李梓敬,當時都覺得好奇怪,但就無深究,亦唔知點解會咁。佢仲大爆原來自己個fb帳戶,平日由幾個「田毛毛」負責,李都係管理員之一,留言前會經佢過目,但自己就好少直接留言,搞唔清楚今次發生咩事。

當聽話自己係李梓敬嘅fb管理員,田少就話認為應該唔係,笑言:「我管理自己個帳戶都搞唔掂,仲點管理佢個帳戶?」對自己被指係管理員茫無頭緒,話要拉埋「田毛毛s」同李梓敬齊齊研究吓呢次嘅「自Like之謎」。

Emily研究過,facebook專頁管理員,係可以將「朋友」名單上人士,加入成為自己管理嘅專頁管理員之一。由於田少同李梓敬係facebook「朋友」,李梓敬確係可以將田少加入成為自己專頁管理員,如果田少好少留言,又冇翻查自己有份管理的專頁,真係未必會留意到。

相關報道:【Emily Online】李梓敬解讀「自Like真相」 原來「真‧田少」係fb管理員 稱唔介意網民嘲笑

其他報道:【多圖:同志夜店槍擊案】港同志團體中環燭光集會 何韻詩黃耀明出席

相關字詞﹕編輯推介

上 / 下一篇新聞