港聞

【Emily Online】曾鈺成出燈謎 事關特首選舉玄機(附答案) (09:19)

政府日前刊憲,宣布來屆行政長官選舉定於明年3月26日舉行;立法會主席曾鈺成今日就喺報章專欄開出燈謎「寬掌彩綢,無財暗卜」,猜四字,並指呢四個字揭示咗下屆行政長官選舉嘅玄機。

其他報道:同志夜店血案槍手任職G4S持槍保安 曾遭FBI兩度調查

曾鈺成今日喺《am730》專欄講到東漢孝女曹娥嘅故事,曹娥因父曹盱在端午節乘船遊江、跳舞拜祭「潮神」伍子胥時墮江淹死,悲痛不已,沿江號哭,晝夜不停,17天後投江而死。後人立碑紀念曹娥,碑文由才子邯鄲淳所寫,全文四百幾字,被認為精妙絕倫。著名學者蔡邕前往憑弔時,讀咗碑文之後,喺碑背題咗八個字:「黃絹幼婦,外孫齏臼」(「齏」音「劑」,係薑、蒜等辛辣調味品;「齏臼」係用嚟研碎呢啲材料嘅器皿)。不過,一直冇人明白呢八個字嘅意思。

最後聰明絕頂嘅楊修話自己猜到啦,係一個四字詞語,而曹操甚感興趣,又唔准楊修揭曉謎底,要自己猜,最終佢都猜到。原來「黃絹」即「色絲」,合「絕」字;「幼婦」即「少女」,合「妙」字;「外孫」係女之子,合「好」字;「齏臼」乃「受辛」之器,合「辭」字。謎底四字就係「絕妙好辭」,係蔡邕對曹娥碑嘅評價。

跟住,曾鈺成就話,由於有呢個故事,「曹娥格」就成為燈謎嘅一個謎格;呢種謎格嘅謎底通常係一個四字詞語,其中每個字可以左右分開,拆成兩個字,合共得出八個字,然後用呢八個字的同義字作出謎面。

曾鈺成接住就開出燈謎:「寬掌彩綢,無財暗卜」,曹娥格,猜四個字,仲講明「信不信由你,這四字揭示了下一屆行政長官選舉的玄機」。Emily好似猜到兩個字,但加埋都冇乜頭緒,大家猜唔猜到呢?(答案在下面)

曾鈺成專欄全文

其他報道:家長舉棋不定 女兼讀3幼園 影響交友 校長﹕家長也要教育

其他報道:申請來港7小時不見女兒不過夜 總統府不同意 馬英九斥不尊重兼損台灣自由民主形象

 

 

 

 

謎底:拒絕欽點

相關字詞﹕編輯推介 特首跑馬仔

上 / 下一篇新聞