港聞

【Emily Online】李慧琼稱「政治殘忍」 鍾樹根:對任何人都會殘忍,幾時落到佢身上架啫 (15:44)

主張「要本土、不要分離」嘅民建聯立法會議員鍾樹根(樹根),因為被黨拒絕排喺名單首位出選港島,講明考慮同民建聯「分離」。黨主席李慧琼(Starry)今朝接受電台訪問,形容「政治有時係好殘忍」,樹根下晝喺立法會被記者問到點睇Starry講法,樹根直言「(政治)對任何人都會殘忍,(睇吓)幾時落到佢身上架啫」。樹根呢一番話,即時引起記者一片嘩然,佢講完都似乎想補鑊,聲稱唔係講緊Starry,話自己唔係指明邊個,而政治殘忍呢家落到自己身上咁解喎。

相關報道:昨晚致電鍾樹根對方稱「很忙」 李慧琼:政治好殘忍

政界有傳民建聯黃容根同樣有意退黨,參選漁農界挑戰黨友何俊賢;樹根講笑話佢同黃容根兩個加埋就係「黐孖根」。樹根話,嚟緊星期日會繼續以民建聯成員身分,出席港台節目《城市論壇》講本土,形容對本土議題「最熟係我」。至於幾時先唔再以民建聯身分出席節目呢?樹根只係話呢個問題「好難答」。

對於係咪真係退黨同幾時退,樹根都無正面回應;被問到如果有其他黨邀請佢加入,佢會唔會考慮呢?樹根講笑咁話,自己會待價而沽喎。

相關報道:鍾樹根稱獲不止一黨招手 田北俊稱若鍾擬加盟「受寵若驚」

其他報道:疑學神港青澳洲撞車 台女毁容 往工作假期 事後即返港

相關字詞﹕立法會選舉 編輯推介

上 / 下一篇新聞