港聞

【圖輯:網上熱話】張德江訪港被批擾民 網民翻炒英皇室政要訪港 融入居民 小朋友旁邊玩韆鞦 (10:48)

人大委員長張德江噚日開展一連3日訪行程,警方喺灣仔、金鐘等地設置水馬、封路、實施人流管制措施,令嗰區塞晒車,有喺嗰區返工嘅打工仔抱怨好唔方便。有網民就搵返英國政要同皇室成員當年訪港嘅相嚟對比,話當時保安部署無咁嚴,市民仲有得近距離親近英女王同公主添。

其他報道:【張德江訪港】湯家驊質疑「保安區」法律理據 指警保安部署「誇張」

網民喺房屋署網頁搵返早年到訪過公屋嘅政客、名人,當中包括英女王、英國前首相戴卓爾夫人、瑪嘉烈公主、安妮公主同美國前總統尼克森等。睇相見到,1975年英女王訪港去咗何文田愛民村參觀,雖然警方都有出動鐵馬,但只有幾個警察戒備,市民仲可以喺唔夠十步嘅距離之內見到英女王,而英女皇上樓探訪愛民村住戶嘅時候,仲有好多小朋友喺走廊一睹英女王風采。

安妮公主就1983年訪港,佢當時到訪啱啱落成嘅香港仔鴨脷洲邨,身邊只有幾個着西裝嘅男人傍住,唔見有警察貼身保護。當佢行過屋邨遊樂場時,仲有啲小朋友喺旁邊玩韆鞦,似乎無因為英國公主到訪而影響平日生活。

美國前總統尼克森1964到訪彩虹邨,更加同居民一齊打羽毛球,切磋球技,圍住佢嘅,唔係着住成套裝備嘅警察,而係一班着得好街坊嘅小朋友。

網民就好搞笑咁話,當年啲差人「唔盡責」,無好好保護英女王同公主,亦有人覺得香港年頭發生過暴力事件,「睇緊啲好啲」;也有人叫香港人包容下,話張德江好快就走,忍多2日。

其他報道:【張德江訪港】湯家驊:張「千辛萬苦」見泛民 已退一步

其他報道:【多相:張德江訪港】民陣遊行至會展抗議遭警阻截 舉黃旗警告

相關字詞﹕張德江訪港 編輯推介

上 / 下一篇新聞

相關新聞