港聞

【Emily Online】去投注站買六合彩先會中頭獎? 今期2注中頭獎 1.5注經網上或電話投注 (23:51)

1.5億元六合彩派彩結果塵埃落定,頭獎2注中,各派8465萬,幸運兒有無你份?唔少人都相信,中頭獎嘅人多數係喺馬會投注站誠心排隊落注,所以每次開彩前,都見到投注站外大排長龍,有人更專程去有人中頭獎的投注站落注,期望成為下一位六合彩頭獎得主。

不過,馬會發言人今晚就話,今期六合彩頭獎2注中,其中有1.5注係經馬會網上或者電話投注戶口購買,剩低嗰0.5注就係喺投注站買。

有馬會中人話,今次正好反映咗中頭獎未必一定要到投注站買,正所謂運氣話嚟就嚟,不妨小注怡情發下橫財夢,但賭博千祈咪沉迷,唔中的話,記準時返工囉。至於點解有0.5注中?係因為以「複式」及「胆拖」形式購買多過6個數字,就可選擇每注5元的「部份注項」,如果中獎,彩金就相應減半,例如今期頭獎每注派8465萬,半注就有4232.5萬。

今期六合彩開彩號碼係20、26、28、32、40、45 特別號碼43,除咗頭獎外,二獎就有9.5注中,注派188萬;三獎有572注中,派8.3萬,而派40元嘅7獎有50幾萬注中,唔知你係咪其中一個呢?

其他報道:【行李風波】飛馬尼拉旅行順道測試 櫃台留手提包終未獲代送 朱幼麟:國泰VIP都無優待 

其他報道:內地男尾隨內地女返酒店綁劫 蒙眼毆打灌安眠藥水掠財 認七罪判囚9年8個月

相關字詞﹕編輯推介 六合彩

上 / 下一篇新聞