港聞

下一篇
上一篇

【Emily Online】 車仔麵加油菜盛惠120元 名廚Jacky Yu呻物價高食嘢「好x貴」 (17:58)

車仔麵一向被視為平民美食,顧客可從眾多餸菜中自選心水配料,令人食指大動。不過私房菜名廚Jacky Yu日前幫襯一間車仔麵店,收費卻高得令人咋舌。

Jacky講明自己大食,所以有加餸,仲加咗個油菜,但就冇點飲品,埋單竟要120蚊,令佢忍唔住大嘆「我覺得依家啲嘢真係好x貴囉!」

相關報道:【120蚊車仔麵】Jacky Yu稱點餸多自然貴 大讚好食會繼續幫襯 店家:用靚料成本高

Jacky昨日喺facebook上載呢碗「天價車仔麵」相片,相中可見的確叫咗好多款餸,包括鹵水雞翼、鹵水蛋、魚皮餃、炸魚皮、豬紅、咖哩魚蛋、等等。

有網民就話認出Jacky幫襯嘅車仔麵店,係屹立銅鑼灣多年的一間著名車仔麵店,更上載一張完整嘅點菜單,店家寫明3款餸加麵底收費40蚊,油菜每碟20蚊,即係Jacky碗麵要100蚊,計計數佢應該叫咗9款餸。

天價車仔麵Post一出,即引來逾百留言,有人話如加點錢已可吃半自助餐,笑話比起去Jacky間舖食午餐仲貴;亦有人就話其實宜家度度食嘢都貴,連鎖快餐店食個飯都要40、50元,點餸多自然收得貴啲。

好多網民指車仔麵平價不再,但亦有網民超理性分析:「今時今日,食材平唔代表要賣得平喎......每樣餸都要花時間逐一去洗切煮,都好多功夫⋯仲有燈油火蠟呢~如果以CWB(銅鑼灣)嘅舖租。$10/一款餸其實唔算過份㗎喇~」。網民更以20至30蚊一杯果汁、15至20蚊一底雞蛋仔及12蚊一串魚蛋作例子,說明現時街頭美食再無平價。

有搞笑網民更笑Jacky係咁圏,圏得咁過癮,「六合彩圈多一粒字(7個字)都$35注啦」;更有人爆笑稱店主或認出Jacky,不好意思收平,安慰佢「是身分的一種」。

 

其他報道:公屋私樓租金差距大 林鄭:公屋效應納入貧窮分析理據充份

學生指公務員退休無憂 普通長者則愁 質問林鄭:咁其實社會係咪公平呢?

 

相關字詞﹕編輯推介

上 / 下一篇新聞