港聞

【Emily Online之行李風波】設計專頁推「特事特辦令」諷特首有特權 網民:居家旅行必備 (16:46)

特首梁振英女兒梁頌昕留低行李後獲專人送回禁區嘅事件,至今爭議未息,唔少市民對於特首女似獲特殊優待大感唔公平。本地設計專頁「Studio Sorry」嘅設計師,日前特意推出「特事特辦令」,令牌一面寫上梁字,暫放到內地淘寶網銷售,每個售價68.9元人民幣,十分搞鬼。

相關報道:【行李風波】高達斌:職員或支持特首 才幫頌昕帶行李

【行李風波】稱與特首通電話職員「講到喊」 前人代朱幼麟:徹頭徹尾濫權事件

令牌仿古設計,驟眼看甚有古裝劇道具Feel,除黃啡色外還有硃砂紅色。令牌照片最早本月16日喺該facebook專頁出現,即獲網民大讚,錄逾2000次分享,另有超過5000人表達喜歡同讚好等心情。

專頁介紹時稱「特事特辦令,搭飛機必備」,因應群情洶湧,專頁昨晚更新消息話正火速生產中,並喺淘寶網限售100個。

網民大讚令牌創意同抽水功力兼備,有人笑稱係居家旅行送禮自用佳品,亦有人話要買嚟做行李牌,以便暢通無阻;有人仲即時劇癮大發,大數古裝劇對白:「好大嘅官威呀包大人」、「大膽刁民,見此令牌仲唔下跪!」

更有不少網民「真‧想買」,有人建議喺禮賓府開個小賣部當紀念品銷售,或明年年宵擺檔,認為定必大賣,建議設計師順便出埋聖旨同免死金牌。有人反問有咗令牌係咪喺街上違例泊車都唔會畀人抄牌。也有網民稱「我真姓梁,想買畀全家保平安!」不過即被人大潑冷水:「人哋嗰個現代令牌會發聲架:叫我梁特首」。

雖然專頁最新公布淘寶網有售,但唔少香港網民都唔收貨,表明拒絕淘寶,專頁即時「特事特辦」,開放留言購買;不過專頁講明,因當中涉及手工,暫難大批製作,只能限量銷售。

其他報道:【毓民擲杯案】黃毓民盤問梁振英問須否叫「梁特首」 裁判官:叫佢證人得喇

相關字詞﹕編輯推介

上 / 下一篇新聞