港聞

莊偉忠fb貼文自稱廢青 準備退休不從政 引述老婆說:可以退休,唔可以唔做嘢 (22:11)

一田百貨行政總裁莊偉忠昨日突然辭職,其去向備受各界關注,莊偉忠今晚在個人facebook專頁貼文,詳列7點回應親朋友好友及外界查詢,文章稱準備退休,但引述其太太所說:「可以退休,唔可以唔做嘢。」談及去向,他稱「將來會做乜,退休兩日至諗啦」,但表明「唔會從政,唔會參與社企,性格不合,感動唔到自己,都無興趣」。

莊偉忠在貼文中自稱「本質上廢青一個,懶得就懶」,別人懂做的他不做,別人不懂做或不敢做,他才有興趣,而過去30年每周工作60小時,實際做了不止40年,「休息吓,多啲陪老婆大人都得啩」。

莊偉忠稱,在一田工作8年已破了個人紀錄,突破空間愈來愈少,而「戰友青出於藍,個個獨當一面,我愈嚟愈得閒」,故退位讓賢。對於外界估計,他因太敢言而「被辭職」,莊偉忠表示「好心啦,估估下大隻講得棚牙,唔知扮知,笑死朕。:o)」。

莊偉忠facebook貼文全文:

老婆:「可以退休,唔可以唔做嘢。」

辭職啫,市場反應唔使咁誇啩,報紙網媒鋪天蓋地,相熟朋友同事連番慰問,連無乜聯絡嘅朋友仔,都用唔同方式表示關心,網上百計千計留言,睇極睇唔哂,點覆呀,不如喺呢度回答喇:

1. 幾年嚟,透過無數訪問、專欄、面書、拙作,演講、私下傾談,我單哂眼㗎喇,大家唔係咁渣,咁都睇唔到、feel唔到、估唔到我準備退休嘛。

2. 做嘢三十年,平均每星期工作超過六十小時,每日瞓五粒鐘,計落做咗唔止四十年,休息吓,多啲陪老婆大人都得啩。

3. 未試過做一份工長過七年,喺一田破紀錄做咗八年,乜鬼都試過玩過做過,失敗過,成功過,發明咗好多世界無嘅新嘢,滿足感好大,但突破空間愈嚟愈細,愈嚟愈難滿足我無可救藥嘅好奇心。

4. 本質上廢青一個,懶得就懶,人識做,我唔做,人唔識唔想唔敢做,我至有興趣做,你估易呀。呢幾年集中創作,已經將實務全面下放,戰友青出於藍,個個獨當一面,我愈嚟愈得閒。但係收咗人工,貢獻又有限,仲識寫個醜字,唔會好似其他腦細咁,罷住毛坑不拉屎,索性退位讓賢,等佢哋跳出我嘅陰影,大步向前行。功成名遂身退,天之道,有乜唔啱。

5. 返工收人工做嘢交差,唔係為咗加入大家庭交心,如果建立到默契友情,嗰啲係bonus,八年嚟,我呢份bonus特別大。好唔捨得班戰友,噚日宣佈嗰時,好多人喊,我好傷心,死忍住兩行眼淚,噚晚通宵眼光光,人生第三次因為工作失眠,希望你哋原諒體諒支持我。

6. 走得太前,太關心政治時事,太敢言,受壓,被辭職。好心啦,估估下大隻講得棚牙,唔知扮知,笑死朕。:o)

7. 唔會從政,唔會參與社企,性格不合,感動唔到自己,都無興趣。但老婆大人吩咐:「可以退休,唔可以唔做嘢。」咁有智慧嘅哲理,小人只能遵命,靜極而動,後會有期。

故意隔日回覆,因為好多問題,瞓醒之後,有時唔見咗,唔同咗,或者細咗。但現今嘅香港,謠言唔會止於智者,公道未必自在人心,咁就勉為其難,解釋一次咁大把。

將來會做乜,退休兩日至諗啦,𠵱家徇眾要求,攪一次傳媒茶聚,一次齋問齋答座談會,詳情遲啲公佈。大家終於明白,點解由舊年十月開始,我唔接受演講邀請,真相大白啦。

掌握最新消息,請Like「明報即時新聞」fb專頁! http://www.facebook.com/mingpaoinews

【打工仔必讀】小編最喜歡呢句:貫徹肥下瘦上,見低拜,見高踩報道: http://bit.ly/1SnSLhP網民揣測莊偉忠因言論「被辭職」 一田否認:如果係都唔係今時今日嘅事 http://bit.ly/1SnBNA1【一田CEO莊...

Posted by 明報即時新聞 on 2016年3月4日

相關字詞﹕編輯推介 莊偉忠 一田

上 / 下一篇新聞