港聞

【Emily Online】服務亞視25年 保安叔叔獨愛舊台徽風褸 (23:16)

亞視今日舉行員工大會,亞視臨時清盤人德勤宣布解僱所有員工,Emily同成班傳媒行家成個下晝就企喺亞視正門外守候。正當亞視嘅員工喺入面接大信封同執嘢走,門口幾名保安就繼續緊守崗位。

Emily見到其中一名保安叔叔著嘅風褸上面,印住嘅仲係亞視舊台徽,就問下保安叔叔喺亞視做咗幾耐。叔叔就話佢入亞視時Emily應該仲未出世,原來28歲入職嘅佢,已經係亞視做咗25年,仲話呢件風褸係「老員工先有」。不過,保安叔叔就同Emily講,但對公司無乜感情,「連杯都無隻,飲水都係用紙杯」,唯一係得件制服風褸。

保安叔叔仲叫埋更亭入面嘅保安哥哥畀埋件新款風褸Emily睇,Emily望嚟望去都見唔到亞視嘅新台徽,仲以為自己眼花。點知保安叔叔就叫佢同事「整個logo出嚟畀人睇啦」,原來亞視保安件新款風褸可以將個台徽摺入去個衫袋度,唔拎返個台徽出嚟仲以為係街買嘅風褸。

呢個保安哥哥就有啲尷尬咁同Emily講,個新台徽「梗係收埋啦大佬,咁樣衰」,佢話平時都會收埋台徽,到「做嘢」時先拎返出嚟喎。

掌握最新消息,請Like「明報即時新聞」fb專頁! http://www.facebook.com/mingpaoinews

【一晚永恆】王守東說:每一個愛護亞洲電視嘅亞視人都好希望亞洲電視能夠去維持廣播去到4月1號......報道: http://bit.ly/1QnLhGP【亞視遣散員工】3月將為受影響員工辦招聘會 張建宗:盡力助被解僱員工...

Posted by 明報即時新聞 on Monday, February 29, 2016

相關字詞﹕亞視 編輯推介 亞視欠薪

上 / 下一篇新聞