港聞

【短片:Emily Online】蔣麗芸感觸二創「憑着愛」 開金口表心聲:誰料到,無人剪布 (17:17)

財政司長曾俊華噚日喺《財政預算案》,以台灣歌手蘇芮名曲「憑着愛」嘅歌詞,話相信香港人幾時都可以喺困難中搵到出路。一向鍾意唱歌嘅民建聯蔣麗芸(Ann姐),今日就有感而發,二次創作首歌嘅歌詞,一展歌喉之餘,仲製作埋MV擺上YouTube。Ann姐認真製作,究竟所謂何事呢?原來係想憑歌寄意,希望立法會停止拉布。

Ann姐喺MV引言話,聽到財爺嘅歌詞十分感觸,「希望港人憑着愛,珍惜我哋嘅香港」。佢之後開金口,「曾踏遍,刺腳的彎路;誰料到,無人剪布」,又話自己怕咗拉布,「遇到幾多次點人,點到心驚震,但我深信終有一日,議事規則必會改」。

MV配以人民力量陳偉業喺會議廳外慶祝流會、本土派團體示威、市民同警方衝突等畫面;唱到「憑着愛,情懷不老」,更加有Ann姐同民主黨何俊仁一齊嘅新聞片段。不過大家放心,其實片段背景係Ann姐想拉何俊仁入會議廳開會。

去到結尾,Ann姐話「面對拉布點人,終會可衝破,無論點都艱苦等待,人生會正義必勝」,又以政府「欣賞香港」活動嘅宣傳片作結,「惟望這小島的波折,盡快無」。呢個2分鐘嘅MV絕無欺場,唔知大家又點評價呢?

掌握最新消息,請Like「明報即時新聞」fb專頁!http://www.facebook.com/mingpaoinews

短片:

相關字詞﹕蔣麗芸 二次創作 憑着愛 財政預算案

上 / 下一篇新聞