港聞

【書店5人失蹤】漫畫家尊子形容事件恐怖曲折離奇好笑神秘 質疑一地兩檢方便捉人 (14:40)

政治漫畫家尊子今日在港台節目《香港家書》,表示銅鑼灣書店5人失蹤正是本港言論自由逐步退縮的例子,形容事件過程集恐怖、好笑、曲折、離奇及神秘在一身。

尊子表示,銅鑼灣書店「攞正牌照做生意,邊會有事」,豈料5人逐一失蹤,事件發酵後更有議員直指當事人嫖妓走私,過程「恐怖過史提芬京、好笑過差理卓別靈、曲折過 J. K. Rowling,離奇過張愛玲,神秘過日本仔拉壯丁」。

他亦批評特首梁振英一直強調中港合作,「我地香港特首『愛國英』,一向強調中港合作,配合國家施政,積極參與一路一帶,所以如果你發現將來一地兩檢,原來係方便帶路捉人嘅話,一啲都唔意外呀。將香港冇犯法嘅市民送過關,揮手自茲去,嘯嘯斑馬鳴,一幅好淒美感人嘅畫面!講到尾,特首都係人,都要為自己嘅前途打拼,下屆能否連任,同建制派嘅立法會議員一樣,靠嘅就係呢啲關鍵時刻站穩隊伍嘞。」

對於近日有書店收起一系列禁書,他笑言:「長遠嚟講,我都為嗰啲唔賣禁書嘅老闆擔心。因為世事無常,政治嘅嘢一天都嫌長,我哋點知薄熙來公子何時東山再起,或者佢啲粉絲一朝得勢,到時回過頭來秋後算帳──當年邊個唔肯賣習總情史書嘅,都是反動派!到時冇賣禁書嘅書商失踪一個又一個,香港特區人口漸漸減少,市面零售業都會受影響,你話幾咁可憐。」

「美國一個腦神經科醫生Oliver Sacks 寫過幾本書,描述神經受損病人的病歷,反覆提及人類大腦的神奇適應功能,某部份知覺缺失,便會自動發展另一部份能力以作補償,個案好鬼有趣。中國人嚐唔到言論自由滋味,於是補償發展了味覺,專注烹調嘅精巧,舌尖嘅享受。下次你嚟香港,會發現香港嘅美食又進一籌,自不待言。」

掌握最新消息,請Like「明報即時新聞」fb專頁! http://www.facebook.com/mingpaoinews

【真係發生過???】報道:http://bit.ly/1OhDcCC【中央應嚴厲阻止跨境綁架 (文:紀碩鳴)】http://bit.ly/1ZbUjLe【書店5人失蹤】何君堯:維護一國兩制 特首責無旁貸...

Posted by 明報偵查報道 on Friday, 8 January 2016

相關字詞﹕編輯推介 香港家書 尊子 銅鑼灣書店

上 / 下一篇新聞