港聞

【懶人包:雙子座流星雨】每小時可達120粒 教你今晚點觀星 (12:52)

「雙子座流星雨」係今年最後亦係最好觀星條件嘅一場流星雨,流星雨高峰期會喺周二(15日)凌晨2時左右出現,加上正值新月時分,觀星更加清楚,就等小編同大家介紹吓,點樣做好最佳準備啦。

雙子座流星雨有乜特別?

香港太空館話,14日晚上至15日凌晨都係適合觀賞時間,今年雙子座流星雨大約喺今晚8點於東北地平線上升起,周二凌晨2點升至天頂,可以話係最佳觀星時間,每小時天頂流星數量可達120粒。今日正值農曆初四,月亮晚上8點28分已落,月光唔會影響觀星。

香港天文學會掩星組組長余惠俊就話,今年雙子座流星雨速度同光度都屬中等,但勝在出現時間較好,喺深夜至凌晨時分已升至天頂,並且流星數量夠密集,市民只需肉眼都可以睇得清楚。

邊度賞星最好?

余惠俊話,觀星最重要揀個夠黑同空曠地方,估計蒲台島、大嶼山水口、萬宜水庫等偏遠地區都係最佳觀星地點,每小時可睇到百幾粒流星,但唔好處係交通不便。至於近少少嘅市郊地區,都可以選擇船灣淡水湖、石澳或長洲營地等,每小時睇到30幾粒流星,而北潭涌就可以睇到70幾粒。

嫌麻煩又想睇星?咁都可以選擇喺屋企附近花園平台之類視野廣闊嘅地方,不過余惠俊就提醒話,每小時大概只能睇到幾粒星咋。

觀星時有乜要注意?

太空館又提醒話,流星雨只需用肉眼觀看,基本上唔需要借助望遠鏡。觀測時記得帶備星圖、紅光電筒、地席或者摺椅。

至於「龍友」如果想做天文攝影,就要配備具有B快門(可長時間曝光)的相機。將鏡頭對焦至無限遠,對準雙子座或其鄰近星座,將光圈校到最大,以400度以上感光值曝光5分鐘,咁就應有收穫。

太空館話,雖然流星雨輻射點喺雙子座,但流星出現時唔一定係輻射點附近天區,而係距離輻射點40至60度嘅地方。余惠俊就教大家,記得望向西北偏西嘅天空,係流星雨出現嘅方向。

天有不測之風雲?

準備咗咁多,睇埋天氣先係最緊要。天文台科學主任何宇恒話,今日下午至晚間都係大致多雲,有可能影響觀星。氣溫方面,因為有東北季候風正影響華南地區,今日正午起新界西已較昨日低3至4度,聽朝早上氣溫會驟降至16度,本周中後期也會持續轉涼。

余惠俊都覺得今晚雲量多,睇到清晰流星雨機會未必好大,但都可以「博一博」,因為晚間散雲較多,未必會遮蓋得到流星雨喎。

小編提醒,外出觀星嘅打工仔,除咗帶足保暖衣物,記得請定假呀!

掌握最新消息,請Like「明報即時新聞」fb專頁!http://www.facebook.com/mingpaoinews

【真的嗎?】關於cap圖,局長話;「我在此給大家肯定的答案-如非切實可行,不一定要援引出處。」報道:http://bit.ly/1YdRh8w王永平:梁振英以身試法為反對者「完美示範」http://bit.ly/1TK9NnW#明報...

Posted by 明報即時新聞 on Sunday, December 13, 2015

相關字詞﹕編輯推介 流星雨 天氣

上 / 下一篇新聞