港聞

【短片:Emily Online】立會走火警僅10議員參與 陳偉業笑稱人數不足「無效」 陳家洛要點人數 (15:23)

立法會大會不時流會,估唔到連立法會大樓嘅定期火警演習,都面對議員人數少嘅問題。今日下晝12點半舉行嘅火警演習,立法會內嘅人員由大樓「逃生」到隔離嘅添馬公園,由火警鐘響起到宣布完成演習嘅大約10幾分鐘內,有500幾人「走火警」,不過當中只得10個議員。

星期三喺大會要求點人數、令大會流會嘅公民黨陳家洛,講笑話走火警唔夠法定人數,要求點人,又同泛民會議召集人何秀蘭講,希望對方召集多啲人嚟演習咁話。不時喺議會拉布嘅人民力量陳偉業,就「宣布」走火警「無效」,覺得唔夠35人(立會大會開會嘅法定人數),應該要再走過。立法會主席曾鈺成同佢哋講笑話,有幾十人失咗蹤。不過,主席之後都講返,走火警議員少,可能係由於中午無會開,所以好多議員根本唔喺大樓入面。

民建聯葉國謙話,自己喺響鐘後遲咗半分鐘先走,因為要搞掂手頭上工作,始終演習無咁大心理壓力。擔唔擔心真係火警嘅時候走唔切呢?阿謙就講笑咁話,驚唔驚「葬身火海」嘅問題,其實記者都要面對。

今次火警演習出席人數上,泛民同建制打成平手,各有5人出席,泛民有馮檢基、張國柱、何秀蘭、陳家洛同陳偉業;建制就有主席曾鈺成、葉國謙、譚耀宗、黃定光同馬逢國。不過,其實有議員喺火警鐘未響之前,就已經離開大樓,包括李慧琼、單仲偕同郭偉強,單仲偕好坦白咁講話要食飯,郭偉強就話約咗睇醫生。

掌握最新消息,請Like「明報即時新聞」fb專頁!http://www.facebook.com/mingpaoinews

【真的嗎?】梁振英又反駁外界批評政府「盲搶地」,「如果盲搶地就唔使個個星期開會啦!」報道:http://bit.ly/21Txy2H【土地問題】梁振英閉門講房屋 「港人講地」獨家報道http://bit.ly/21TsjQA#明報...

Posted by 明報即時新聞 on Thursday, December 10, 2015

相關字詞﹕編輯推介 立法會

上 / 下一篇新聞