港聞

下一篇
上一篇

【短片:Emily online】李家仁《小明撐美芬》助撼游蕙禎 邊個填詞真係咁神秘? (18:07)

有「小明」之稱嘅兒科醫生李家仁,今日將佢首名曲《小明上廣州》改編成《小明撐美芬》,支持爭取在黃埔東選區連任嘅經民聯梁美芬,並聯同民建聯大律師馬恩國、工程界立法會議員盧偉國等人喺街頭即席高唱。

紅磡道同德民街交界嘅十字路口,係嗰區候選人必爭之地,李家仁、馬恩國、盧偉國下晝齊齊到場兼傍住梁美芬,由李家仁帶領眾人多次高唱《小明撐美芬》,以歌聲與對手青年新政游蕙禎喺行人路兩邊「打對台」。

「真誠為社區,更喜有專業導航」、「真誠為社區,美芬美芬we stand by you......」面對眾人高歌產生嘅「音波功」,游蕙禎一度要合眼集中精神才能繼續嗌咪。

Emily留意到,《小明撐美芬》歌紙上嘅填詞人寫上《小明上廣州》原作者韋然嘅名,即向韋然求證,佢話「我有畀過意見」,指李家仁早前曾提過想改編,佢無反對,開心首歌有其他改編版本,但稱對小明公開獻唱一事並不知情,「你打電話嚟我先知,我都唔知今日選舉」,又稱「相信係民間改編版本」。

咁究竟《小明撐美芬》歌詞係唔係出自佢手筆?韋然話「我唔會畀任何comments(意見),唔願意答呢個問題,唔答任何Yes or No(是或否),好多嘢我都唔知點答」。至於係咪支持梁美芬,佢只話自己非該區選民,但「如果做得好我一定支持,做得唔好我就反對,無論係民建聯定係泛民」。

李家仁就同Emily講,《小明撐美芬》歌詞「係韋然架!係韋然架」,透露係佢尋晚搵經理人兼死黨韋然創作,對方今日凌晨3點作好,並稱將歌曲用來助選「佢(韋然)梗係知啦!」

如此這般,個波又推返畀韋然,這次韋然就話因未同李家仁溝通故唔想答,坦言有些事「你哋傳媒認為好有趣但好敏感」,佢想「保持沉默」。佢又話可以不分政黨寫畀其他候選人,「如果違反道德我會抗拒,如果係好事我會支持。」

黃埔東選區3名候選人亦包括報稱獨立的羅錫明。

掌握最新消息,請Like「明報即時新聞」fb專頁! http://www.facebook.com/mingpaoinews

【一生難忘】你今日又投咗未~詳情:http://bit.ly/1X5UfAV【區選決戰】投人生第一票 黃之鋒:暢快http://bit.ly/1X5UkVi【區選決戰(不斷更新)】下午2時30分投票率21% 高於上屆...

Posted by 明報即時新聞 on Saturday, November 21, 2015

相關字詞﹕區議會選舉 編輯推介

上 / 下一篇新聞